اسلام آباد (نیوز ڈیسک)  2022 میں Apple Inc. نے آئی فون صارفین کے لیے سیٹلائٹ کے ذریعے ایمرجنسی ایس او ایس پیغام بھیجنے کی سہولت متعارف کرائی تھی، جس کا بنیادی مقصد ہنگامی حالات میں انسانی جانوں کا تحفظ یقینی بنانا ہے۔ یہ فیچر ایسے مقامات پر بھی کام کرتا ہے جہاں نہ موبائل سگنل دستیاب ہوں اور نہ وائی فائی، اور صارف کو ٹیکسٹ پیغام کے ذریعے امدادی اداروں سے رابطے کا موقع دیتا ہے۔

حال ہی میں اسی سہولت نے ایک بار پھر مؤثر ثابت ہوتے ہوئے چھ افراد کی جان بچانے میں مدد دی۔ امریکا میں Lake Tahoe کے قریب اسکیئنگ کے دوران چھ افراد برفانی تودے (ایوا لانچ) میں پھنس گئے۔ ریسکیو حکام کے مطابق متاثرہ علاقے میں موبائل یا انٹرنیٹ سگنلز موجود نہیں تھے، جس کے باعث روایتی ذرائع سے مدد طلب کرنا ممکن نہیں تھا۔

پھنسے ہوئے افراد نے آئی فون 14 سے 17 سیریز میں دستیاب سیٹلائٹ ایس او ایس فیچر استعمال کیا۔ اس نظام کے فعال ہوتے ہی فون براہِ راست سیٹلائٹ سے منسلک ہو جاتا ہے اور ہنگامی پیغام متعلقہ اداروں تک پہنچا دیتا ہے، جس کے ساتھ صارف کی لوکیشن بھی شیئر ہوتی ہے۔

ان افراد نے اسی سہولت کے ذریعے Nevada County Sheriff’s Office کو اطلاع دی۔ California Governor’s Office of Emergency Services کے حکام کے مطابق ریسکیو ٹیم کا ایک اہلکار تقریباً چار گھنٹے تک مسلسل رابطے میں رہا تاکہ امدادی کارروائی مؤثر انداز میں مکمل کی جا سکے۔

کئی گھنٹوں کی جدوجہد کے بعد تمام چھ افراد کو بحفاظت نکال لیا گیا۔ یاد رہے کہ یہ سیٹلائٹ ایس او ایس فیچر امریکا اور کینیڈا میں پہلے بھی متعدد ہنگامی مواقع پر جانیں بچانے میں مددگار ثابت ہو چکا ہے۔