اسلام آباد (نیوز ڈ یسک) امریکا اور ایران کے درمیان بڑھتی ہوئی کشیدگی کے اثرات عالمی منڈیوں پر بھی نمایاں ہونے لگے ہیں،

جس کے باعث خام تیل کی قیمتیں گزشتہ چھ ماہ کی بلند ترین سطح تک پہنچ گئی ہیں۔عالمی مارکیٹ میں برطانوی برینٹ خام تیل 62 سینٹ اضافے کے بعد 71.39 ڈالر فی بیرل پر ٹریڈ ہو رہا ہے۔ اسی طرح امریکی ویسٹ ٹیکساس انٹرمیڈیٹ (WTI) کی قیمت بھی 37 سینٹ بڑھ کر 66.21 ڈالر فی بیرل تک جا پہنچی ہے۔ادھر غیر یقینی عالمی صورتحال کے باعث سونے کی قیمت میں بھی نمایاں اضافہ دیکھنے میں آیا ہے، اور فی اونس سونا 107 ڈالر مہنگا ہو کر 5200 ڈالر کی حد عبور کر گیا ہے۔اس تناظر میں امریکی صدر ڈونلڈ ٹرمپ نے ایک بار پھر سخت مؤقف اپناتے ہوئے کہا ہے کہ اگر ایران نے معاہدہ نہ کیا تو اسے سنگین نتائج کا سامنا کرنا پڑ سکتا ہے۔

انہوں نے سوشل میڈیا پلیٹ فارم ٹروتھ سوشل پر جاری بیان میں ایران پر حملے سے متعلق بعض خبروں کو بے بنیاد قرار دیا اور کہا کہ ممکنہ جنگ سے متعلق قیاس آرائیاں غلط ہیں۔ صدر ٹرمپ کا کہنا تھا کہ ایرانی عوام ایک عظیم قوم ہیں اور انہیں نقصان نہیں پہنچنا چاہیے۔