کراچی (نیوز ڈیسک) شہر کے علاقے ڈسٹرکٹ ویسٹ کی اقبال مارکیٹ میں واقع ایک جیولری دکان میں بڑی واردات پیش آئی، جہاں نامعلوم افراد دیوار توڑ کر کروڑوں روپے مالیت کا سونا اور قیمتی سامان لے گئے۔

متاثرہ دکاندار ایوب خان کے مطابق وہ 13 تاریخ کو معمول کے مطابق دکان بند کرکے گئے تھے، تاہم اگلے روز جب کاریگر دکان کھولنے پہنچے تو سیف باکس خالی ملے۔ مزید جانچ پر معلوم ہوا کہ دکان کی پچھلی جانب دیوار توڑ کر اندر داخل ہوا گیا تھا۔انہوں نے بتایا کہ تقریباً 606 تولے سونا، جس کا وزن تقریباً 7 ہزار 64 گرام بنتا ہے، غائب ہے جبکہ ہیرے اور دیگر اشیا بھی چوری ہوئیں جن کی مالیت تقریباً 25 لاکھ روپے بتائی جا رہی ہے۔واقعے کے بعد متاثرہ جیولر نے تھانہ اقبال مارکیٹ میں مقدمہ درج کرا دیا ہے جبکہ پولیس نے قانونی کارروائی شروع کر دی ہے اور ملزمان کی تلاش جاری ہے۔