اسلام آباد (نیوز ڈیسک)عالمی مارکیٹ میں پیٹرول کی قیمت میں نمایاں کمی دیکھنے میں آئی ہے، جہاں فی بیرل قیمت 2 ڈالر 74 سینٹ کم ہو گئی ہے۔ اس کمی کے بعد پیٹرول کی عالمی قیمت 69.27 ڈالر فی بیرل سے گھٹ کر 66.54 ڈالر فی بیرل تک آ گئی ہے۔خام تیل کی عالمی منڈی میں قیمتوں میں کمی کا سلسلہ بدستور جاری ہے۔ اس دوران پیٹرول پریمیم میں بھی فی بیرل 13 سینٹ کی کمی ریکارڈ کی گئی، جس کے بعد پریمیم 5 ڈالر 14 سینٹ سے کم ہو کر 5 ڈالر ایک سینٹ رہ گیا۔ اسی طرح پیٹرول پر فی لیٹر کسٹم ڈیوٹی میں 72 پیسے اور ایکسچینج ایڈجسٹمنٹ میں 68 پیسے فی لیٹر کمی کی گئی ہے۔

ذرائع کے مطابق ان تمام عوامل کے باعث پیٹرول کی ایکس ریفائنری قیمت میں مجموعی طور پر 6 روپے 51 پیسے فی لیٹر کی کمی ہوئی ہے، جس کے بعد قیمت 145 روپے 57 پیسے سے کم ہو کر 139 روپے 6 پیسے فی لیٹر پر آ گئی ہے۔دوسری جانب عالمی سطح پر ڈیزل کی قیمت میں بھی کمی ریکارڈ کی گئی ہے۔ ڈیزل کی فی بیرل قیمت 2 ڈالر 33 سینٹ کم ہونے کے بعد 76.32 ڈالر سے گھٹ کر 73.99 ڈالر فی بیرل ہو گئی ہے۔ڈیزل پر کسٹم ڈیوٹی میں فی لیٹر 80 پیسے اور ایکسچینج ایڈجسٹمنٹ میں 35 پیسے کی کمی کی گئی، جس کے نتیجے میں ڈیزل کی ایکس ریفائنری قیمت میں 5 روپے 33 پیسے فی لیٹر کی کمی آئی۔

اس کمی کے بعد ڈیزل کی قیمت 155 روپے 33 پیسے سے کم ہو کر 149 روپے 99 پیسے فی لیٹر ہو گئی ہے۔عالمی منڈی میں تیل کی قیمتوں میں اس کمی کے اثرات مقامی سطح پر پیٹرولیم مصنوعات کی قیمتوں پر بھی مرتب ہونے کا امکان ظاہر کیا جا رہا ہے، تاہم حتمی فیصلے کا اختیار متعلقہ حکام کے پاس ہوگا۔