اسلام آباد (این این آئی)الیکشن کمیشن کی دی گئی ڈیڈ لائن تک 446 اراکین پارلیمنٹ و صوبائی اسمبلیوں کی جانب سے اپنے اثاثہ جات کے گوشوارے جمع نہیں کرائے جا سکے، 15 جنوری تک گوشوارے جمع نہ کرائے گئے تو 16 جنوری 2026 سے ان کی رکنیت معطل کر دی جائے گی۔ الیکشن کمیشن کی جانب سے جاری کی گئی تفصیلات کے مطابق ہر سال 31 دسمبر تک اراکین پارلیمنٹ و صوبائی اسمبلیوں کی جانب سے اپنے اور اپنے زیر کفالت افراد کے گوشوارے جمع کرانے لازمی ہوتے ہیں،
انتخابی قانون 2017 کی شق 137 کے تحت 15 جنوری تک ان ارکان کو مہلت دی جاتی ہے کہ وہ اپنے گوشوارے جمع کرائیں تاہم اس میں ناکام رہنے والے اراکین کی رکنیت 16 جنوری سے معطل کر دی جاتی ہے تاہم گوشوارے جمع کرانے پر ان کی رکنیت بحال کر دی جاتی ہے، سینیٹ کے 26 ، قومی اسمبلی کے 125، پنجاب اسمبلی کے 159 ، سندھ اسمبلی کے 62، خیبرپختونخوا اسمبلی کے 48 اور بلوچستان اسمبلی کے 26 اراکین کی جانب سے ان کے اپنے اور زیر کفالت افراد کے مالی سال 25ـ2024 کے اثاثہ جات کے گوشوارے جمع نہیں کرائے گئے، 16 جنوری 2026 سے ان ارکان کی رکنیت معطل کر دی جائے گی۔
