اسلام آباد (نیوز ڈیسک)اطلاعات کے مطابق ایپل آئندہ برسوں میں اپنے روایتی آئی فون اجراء کے طریقۂ کار میں بڑی تبدیلی لانے کی تیاری کر رہا ہے۔ بلومبرگ کی ایک تازہ رپورٹ میں بتایا گیا ہے کہ کمپنی 2026 میں معمول کے مطابق اسٹینڈرڈ آئی فون 18 متعارف نہیں کرائے گی، بلکہ اس کی لانچنگ کچھ ماہ بعد منتقل کردی جائے گی۔ اس فیصلے کا مقصد ملازمین پر کام کا بوجھ کم کرنا اور مجموعی آمدنی میں بہتری لانا بتایا جا رہا ہے۔
رپورٹ کے مطابق 2026 میں ایپل صرف آئی فون 18 پرو ماڈلز جاری کرے گا۔ اسی سال کمپنی پہلی بار اپنا فولڈ ایبل آئی فون بھی پیش کرے گی، جسے حالیہ برسوں کی سب سے اہم ڈیوائس قرار دیا جا رہا ہے۔آئی فون 18 سیریز کے باقی ماڈلز—جن میں آئی فون 18، آئی فون 18 ایئر اور آئی فون 18 ای شامل ہوں گے—مارچ سے مئی 2027 کے درمیان کسی وقت متعارف ہوں گے۔ایپل گزشتہ کئی سال سے ہر ستمبر میں نئے آئی فونز لانچ کرتا آرہا ہے، جبکہ ای ورژن یا ایس ای ماڈلز عام طور پر سال کے ابتدائی مہینوں میں پیش کیے جاتے ہیں۔افواہوں کے مطابق فولڈ ایبل آئی فون میں کیمرہ ڈسپلے کے اندر چھپا ہوگا اور اس کا ڈیزائن کسی کتاب کی طرح کھلنے اور بند ہونے کے قابل ہوگا۔
اس ڈیوائس کی بیٹری لائف بھی بہتر بنانے کی اطلاعات ہیں، جس کے باعث اس کی قیمت کم ہونے کا امکان نہیں۔اگرچہ متوقع قیمت کی تصدیق نہیں ہوئی، تاہم قبل ازیں سامنے آنے والی رپورٹس میں بتایا گیا تھا کہ اس کی قیمت تقریباً 2100 سے 2500 ڈالر کے درمیان ہوسکتی ہے۔مزید یہ کہ پہلا فولڈ ایبل آئی فون 7.9 سے 8.3 انچ کے قریب سائز رکھ سکتا ہے۔ یہ فون لچکدار او ایل ای ڈی اسکرین کے ساتھ آئے گا، جو ہزاروں مرتبہ فولڈ ہونے کے باوجود متاثر نہیں ہوگی۔ اندر نیا طاقتور پراسیسر اور اعلیٰ معیار کا کیمرا سسٹم شامل کیے جانے کا بھی امکان ظاہر کیا جا رہا ہے۔
