کراچی(این این آئی)شہر قائد میں جاری ای ٹریکس نظام کے تحت جاری ہونے والے ای چالان کے لئے کراچی ٹریفک پولیس نے روبوٹس متعارف کرانے کا فیصلہ کیا ہے۔ڈی آئی جی ٹریفک پیر محمد شاہ نے کراچی میں ایک تقریب سے خطاب کرتے ہوئے کہا کہ کراچی میں ای چالان کے لئے ایک تیسرا طریقہ بھی متعارف کرا رہے ہیں وہ روبوٹس کے ذریعے ہو گا۔
انہوں نے کہاکہ آئندہ ماہ سے ہم مختلف سڑکوں پر نو پارکنگ اور نو ٹو لین کے بورڈز لگا رہے ہیں۔ صدراور طارق روڈ سمیت مختلف سڑکوں پر روبوٹس چلیں گے، ان کی اسپیڈ 20 کلو میٹر فی گھنٹہ ہو گی۔انہوں نے کہا کہ روبوٹس چلتے ہوئے گاڑیوں کو اسکین کرتے جائیں گے اورجو بھی گاڑی پارکنگ یا ٹریفک قوانین کی خلاف ورزی کرے گی انہیں ای چالان موصول ہو جائے گا۔واضح رہے کراچی میں ٹریک سسٹم کے تحت دو ہفتوں کے دوران ٹریفک قوانین کی خلاف ورزی پر 50 ہزار کے قریب شہریوں کے چالان کئے جا چکے ہیں۔
