اسلام آباد (نیوز ڈ یسک )سرکاری ملازمت کے خواہشمند امیدواروں کے لیے بڑی خوشخبری سامنے آگئی — سندھ حکومت نے گریڈ 5 سے 15 تک کی بھرتیوں پر عائد پابندی ختم کرتے ہوئے بھرتی کے عمل کا باقاعدہ آغاز کرنے کا اعلان کر دیا ہے۔تفصیلات کے مطابق حکومت سندھ کی جانب سے جاری نوٹیفکیشن میں ہدایت دی گئی ہے کہ تمام محکمے قواعد و ضوابط کے مطابق بھرتی کا عمل شروع کریں۔ مقصد یہ ہے کہ تمام بھرتیاں شفاف، ڈیجیٹل اور میرٹ پر مبنی نظام کے تحت مکمل کی جائیں۔امیدوار www.sjp.gos.pk پر جا کر اپنی پروفائل بنا سکتے ہیں، مطلوبہ دستاویزات اپ لوڈ کر کے آن لائن درخواستیں جمع کرا سکتے ہیں۔

یاد رہے کہ وزیراعلیٰ سندھ مراد علی شاہ نے 28 اکتوبر کو سندھ جاب پورٹل (SJP) کا افتتاح کیا تھا، جس کے بعد سندھ پاکستان کا پہلا صوبہ بن گیا جس نے سرکاری ملازمتوں کے لیے مرکزی آن لائن پلیٹ فارم متعارف کرایا۔یہ پورٹل سائنس اینڈ انفارمیشن ٹیکنالوجی ڈیپارٹمنٹ اور سکھر آئی بی اے یونیورسٹی کے اشتراک سے تیار کیا گیا ہے۔ اس نظام کے ذریعے امیدوار آسانی سے رجسٹریشن، دستاویزات کی اپ لوڈنگ، اور مختلف محکموں میں درخواستیں جمع کر سکتے ہیں۔افتتاح کے موقع پر وزیراعلیٰ سندھ نے کہا تھا کہ یہ منصوبہ شہید محترمہ بینظیر بھٹو کے وژن کے مطابق مساوی روزگار کے مواقع فراہم کرنے کی جانب ایک اہم قدم ہے۔انہوں نے مزید بتایا تھا کہ گریڈ 1 سے 5 تک کی بھرتیاں پندرہ دنوں کے اندر شروع کر دی جائیں گی، جبکہ اعلیٰ گریڈز کی بھرتیاں بھی اسی ڈیجیٹل نظام کے تحت جلد شروع کی جائیں گی۔وزیراعلیٰ نے واضح کیا کہ پورٹل میں آن لائن ٹیسٹ شیڈولنگ، فوری نتائج کی اپ ڈیٹس اور محکمہ خزانہ سے مربوط نظام شامل کیا گیا ہے تاکہ بھرتی کے عمل میں کسی قسم کی تاخیر یا بے ضابطگی نہ ہو۔