کراچی(این این آئی) پاکستان میں گھی اور کوکنگ آئل کی قیمت میں ہوشربا اضافہ کردیا گیا ، جس سے مہنگائی سے پریشان عوام کی مشکلات میں اضافہ ہوگیا ہے۔تفصیلات کے مطابق پاکستان بھر میں گھی اور کوکنگ آئل کی قیمتوں میں ایک بار پھر اضافہ کردیا گیا ہے، جس کے بعد گھریلو صارفین کو اضافی بوجھ برداشت کرنا پڑے گا۔مینوفیکچررز نے اعلان کیا ہے کہ گھی اور آئل کی قیمت میں فی کلو 12 روپے اضافہ کیا گیا ہے۔

جس کے بعد اوپن مارکیٹ میں 16 کلو گھی کا تھیلا اب 8,550 روپے کا ہو گیا ہے، جس کا مطلب ہے فی کلو گھی کی قیمت میں 100 روپے کا اضافہ ہوا۔اسی طرح 5 کلو پیک کوکنگ آئل کی قیمت 2,800 سے 2,850 روپے تک جا پہنچی ہے، یعنی فی پیک 70 روپے مہنگا ہو گیا ہے۔ہول سیل مارکیٹ میں گھی فی کلو 535 روپے اور کوکنگ آئل فی کلو 572 روپے میں فروخت ہو رہا ہے۔ڈیلرز کے مطابق مختلف برانڈز کے آئل اور گھی کی قیمتوں میں فی لیٹر یا فی کلو 10 سے 15 روپے کا اضافہ ریکارڈ کیا گیا ہے۔اضافے سے ملک کے بڑے برانڈز متاثر ہوئے ہیں، ۔ مثال کے طور پر کنگ آئل کا 10 لیٹر کین اب 6,400 روپے کا ہو گیا ہے، جبکہ دیگر برانڈز کے 5 لیٹر اور فی کلو پیکٹس بھی نمایاں مہنگے ہو چکے ہیں۔