لاہور (این این آئی)فلم انڈسٹری کی بقا کیلئے یہ اقدام انتہائی ضروری ہے ، سید نور ، میرا ، ثنا اور گلوکارہ شبنم مجید نے بھی تجویز کی حمایت کر دی۔ بجٹ میں ٹیکس سے سب گھبراتے ہیں لیکن غیر ملکی ماڈلز اور غیر ملکی ڈراموں پر ٹیکس لگنے سے اداکارہ خوش ہیں ۔ اب فلمی ستاروں نے مطالبہ کیا ہے کہ ڈراموں کی طرح غیر ملکی فلموں پر بھی ٹیکس لگایا جائے تاکہ مقامی فلم انڈسٹری زندہ ہوسکے ۔ ٹیکس نامنظور کے نعرے بہت ہوگئے ، فلمی ستاروں نے ٹیکس منظور کا نعرہ لگا دیا ۔میڈیا ذرائع کے مطابق فلمی ستاروں نے مطالبہ کیا ہے کہ غیر ملکی ڈراموں کی طرح غیر ملکی فلموں پر بھی ود ہولڈنگ ٹیکس لگایا جائے ۔ ہدایت کار سید نور کہتے ہیں غیر ملکی فلموں پر ٹیکس لگا کر پاکستانی فلم انڈسٹری پر خرچ کیا جائے ۔ سیدنور کی بات سے اداکارہ میرا ، ثناء اور ، گلوکارہ شبنم مجید نے بھی اتفاق کیا ۔ پاکستانی فلم انڈسٹری کو وسائل کے ساتھ کئی مسائل کا سامنا بھی ہے ، فلم مالک پر پابندی کا معاملہ عدالت میں ہے ۔