کراچی (این این آئی) پاکستانی روپے کے مقابلے میں امریکی ڈالر سمیت یورپین ممالک کی اہم کرنسیوں بشمول یورو اور برطانوی پاؤنڈ کی قدروں میں مندی ریکارڈ کی گئی۔ بدھ کو امریکی ڈالر، یورو اور برطانوی پاؤنڈ کی قدروں میں بالترتیب 30 پیسے، 57 پیسے اور 1.66 روپے کی کمی رونماء ہوئی۔ نیشنل بینک آف پاکستان سے جاری کردہ اعداد و شمار کے مطابق امریکی ڈالر اپنی گذشتہ کاروباری روز کی قیمت فروخت 105.95 روپے سے کم ہو کر 105.65 روپے اور قیمت خرید 103.44 روپے سے کم ہو کر 103.14 روپے رہ گئی۔ مزیدبرآں یورو کی قیمت فروخت 118.06 روپے سے کم ہو کر 117.49 روپے اور قیمت خرید 115.26 روپے سے کم ہو کر 114.71 روپے پر بند ہوئی۔ اسی طرح برطانوی پاؤنڈ کی قیمت فروخت بھی 155.67 روپے سے کم ہو کر 153.02 روپے اور قیمت خرید 151.98 روپے سے کم ہو کر 149.39 روپے رہی۔