اسلام آباد (نیوز ڈیسک) نگران وزیراعلیٰ پنجاب محسن نقوی نے مظفر گڑھ کے تھانہ محمود کوٹ کی حدود میں زیادتی کے بعد بچی کے قتل کے واقعہ کا نوٹس لیتے ہوئے آر پی او ڈیرہ غازی خان سے رپورٹ طلب کر لی ہے۔ وزیراعلیٰ محسن نقوی نے ہدایت کی ہے کہ گرفتار ملزمان کے خلاف قانون کے مطابق سخت کارروائی عمل میں لائی جائے اور بچی کے لواحقین کو انصاف کی فراہمی یقینی بنائی جائے۔ انہوں نے کہا کہ ملزمان نے گھناؤنے جرم کا ارتکاب کیا، کسی رعایت کے مستحق نہیں۔ دریں اثناء پولیس نے مقدمہ درج کرکے 2 ملزمان کو گرفتار کر لیا ہے۔ وزیراعلیٰ محسن نقوی نے لواحقین سے دلی ہمدردی اور تعزیت کا اظہار کیا ہے اور انصاف فراہم کرنے کی یقین دہانی کرائی ہے۔