اسلام آباد (مانیٹرنگ ڈیسک ،این این آئی)پی ٹی آئی نے حکومت اور دیگر اسٹیک ہولڈرز سے مذاکرات اور بات چیت کیلئے شرائط طے کر دیں ۔تفصیلات کے مطابق پی ٹی آئی کی جانب سے فواد چوہدری نے سماجی رابطے کی ویب سائٹ پر جاری ایک بحث میں حصہ
لیتے ہوئے پنجاب اور خیبر پختونخوا اسمبلیاں توڑنے کی تجویز پر واضح کہا کہ اگر ہم پنجاب اور کے پی اسمبلی توڑتے ہیں تو ایک ایسا معاہدہ ہونا چاہیے جس کے ذریعے الیکشن کمیشن بدلا جائے اور سندھ اسمبلی بھی تحلیل ہونی چاہیے کیونکہ اس الیکشن کمیشن کے ہاتھ میں تو سب کچھ نہیں دیا جا سکتا ،فواد چوہدری نے کہا کہ یہی ہمارا موقف ہے اور اسی بات پر ہی اسٹیک ہولڈرز سے بات چیت ہو گی۔علاوہ ازیں ایک انٹرویو میں فواد چوہدری نے کہا کہ امریکا نے عمران خان پر حملے پر سخت ردعمل دیا، ہم امریکا سے دشمنی نہیں چاہتے، صرف یہ چاہتے ہیں کہ امریکا ہمیں غلام نہ سمجھے، رپورٹنگ معیار بہت نیچے گئے ہیں، الفاظ کو ٹوئسٹ کر دیتے ہیں، فنانشل ٹائمز میں اوریجنل الفاظ کچھ اور تھے۔انہوں نے کہا کہ امریکا پالیسی بڑی واضح ہے کہ ہم امریکا سے بہت اچھے تعلقات رکھنا چاہتے ہیں، ہم امریکا سے صرف یہ چاہتے ہیں کہ ہمیں غلام نہ سمجھیں، ہمیں ان سے وہی تعلقات چاہئیں جو ان کے بھارت سے ہیں۔فواد چوہدری نے کہا کہ امریکا سے تعلقات خراب نہیں ہیں، عمران پر حملے پر امریکا نے مضبوط ری ایکشن دیا، خفیہ ملاقاتوں کا ایشو نہیں ہے، ہمارے لوگ امریکی سفارت خانے میں بلانے پر ضرور جائیں گے، ان سے دشمنی نہیں مگر وہ ہمیں ڈکٹیٹ نہ کریں۔
