کراچی (این این آئی) عام لوگ اتحاد کے رہنما جسٹس (ر) وجیہ الدین نے ٹی 20 ورلڈ کپ کے نتیجے پر کہاہے کہ عالمی کرکٹ اسٹیبلشمنٹ نے مالی فوائد اور دیگر مقاصد کیلئے جنٹل مین گیم کو روند ڈالا ہے۔ انہوں نے کہا کہ کرکٹ خصوصاً انٹرنیشنل کرکٹ، رفتہ رفتہ ایک کھیل سے ماورا شکل اختیار کر چکا ہے۔ حالیہ اختتام پذیر ٹی ٹوئنٹی کپ

اس امر کا بین ثبوت ہے۔ انگلینڈ کا آئرلینڈ، پاکستان کا زمبابوے، جنوبی افریقہ کا نیدرلینڈ، آسٹریلیا کا نیوزی لینڈ اور بھارت کا جنوبی افریقہ سے ہارنا انہیں شواہد کی مثالیں ہیں۔ ان بڑے وقوعات سے عام طور پر صرفِ نظر کر کے مقابلوں کی باریک بینی میں الجھ جایا جاتا ہے اور جو بڑی پکچر ترتیب دینے والی انٹرنیشنل کرکٹ اسٹیبلشمنٹ ہے، وہ ہمیشہ منظر سے دور اور پس پردہ ہی رہی۔ حالانکہ اسی کے اشاروں پر کھربوں ڈالر کے سٹے لگتے ہیں۔ یہ بھی کوئی راکٹ سائنس نہیں کہ متعلقہ ممالک کی حکومتوں کے ہاتھ رنگے بغیر یہ اہداف حاصل نہیں کئے جا سکتے۔ اس پس منظر میں بھارت کی پچھلے ورلڈ کپ میں پاکستان کے ہاتھوں دس وکٹوں سے تذلیل اور اب اسی مارجن سے انگلینڈ کے ہاتھوں شکست کو دیکھا جائے تو کوئی غیر معمولی بات نہیں۔ اسی طرح پچھلا ورلڈ کپ، غالباً پلان کے خلاف آسٹریلیا نے اپنے نام کرلیا تو اس مرتبہ وہ از خود کم میچ پوائنٹس لے کر سیمی فائنل سے دستبردار ہوا اور انگلینڈ کی سیمی فائنل کیلئے راہ ہموار کر دی۔ اس بڑی پکچر کو سامنے رکھتے ہوئے ہمارا بابر اعظم، روہیت شرما یا آسٹریلوی کپتان فنچ کو (جو آخری میچ کھیلا بھی نہیں) کو الزام دینا صرف اس حد تک بنتا ہے کہ حفیظ کاردار، عمران خان یا مصباح الحق جھکے تو شاید ہوں مگر ٹوٹے نہیں۔ انہوں نے کہا فائنل میں جس طرح بابر اعظم، محمد حارث، افتخار احمد،

محمد نواز اور وسیم جونیئر آؤٹ ہوئے ایسا تو شاید اسکول کرکٹ میں بھی نہ ہوتا ہو۔ اصولاً 137 رنز بنانے پر ہماری تاریخ ساز تذلیل ہونا تھی، مگر اچھی بالنگ کی وجہ سے بمشکل عزت بچی۔ آخر میں صرف اتنا کہنا رہ جاتا ہے کہ اگر شاہین آفریدی فیلڈ میں کسی ایسی جگہ تعینات کئے جاتے کہ انہیں جستیں لگانے کی ضرورت نہ پڑتی تو شاید ان کے دو اوور جو ضائع ہوئے، ان میں گورے 138 کا ہدف بھی بمشکل حاصل کر پاتے۔ مگر پلان توڑنے کی جرأت کون کرتا؟