لاہور ( این این آئی)لاہور میں پیشہ ور بھکاریوں کے بھیس میں جرائم پیشہ افراد کے مجرمانہ کاروائیوں میں ملوث ہونے کا انکشاف ہوا ہے ۔ اس حوالے سے گفتگوکرتے ہوئے سی سی پی او لاہور غلام محمود ڈوگر نے کہا کہ لاہور پولیس کا پیشہ ور بھکاریوں کیخلاف آپریشن جاری۔

گزشتہ ماہ 354 پیشہ وربھکاریوں کو گرفتار کر کے مقدمات درج کیے گئے ۔ گرفتار بھکاریوں میں 349مرد،05 خواتین بھکاری شامل ہیں ۔رواں سال اب تک3781پیشہ ور بھکاری گرفتار،3723 مقدمات درج ہوئے ، گرفتار گداگروں میں 3618مرد،150خواتین اور ان کے 13 سہولت کا شامل ہیں ۔سٹی ڈویژن پولیس نے 793، صدر ڈویژن703،ماڈل ٹان ڈویژن پولیس نے 678بھکاری گرفتار کئے،کینٹ ڈویژن پولیس نے 633، اقبال ٹان ڈویژن547، سول لائنز ڈویژن پولیس نے427 گداگر گرفتار کئے۔انہوں نے انکشاف کیا کہ پیشہ ور بھکاریوں کے بھیس میں جرائم پیشہ افراد مجرمانہ کاروائیوں میں ملوث پائے گئے، شاہرائوں پر بھیک مانگنے والے مانگنے والے بچوں کوچائلڈ پروٹیکشن اینڈ ویلفیئر بیورو کے حوالے کیا گیا، لاہور پولیس،چائلڈ پروٹیکشن بیورو اور سوشل ویلفیئرز کی مشترکہ ٹیموں کی کاروائیاں جاری ہیں، ڈویژنل ایس پیز اپنے علاقوں سے بھکاری مافیا کا تدارک کریں۔غلام محمود ڈوگر نے کہا کہ بچوں کو اس گھنانے دھند ے میں ملوث کرنے والے عناصر کسی رعایت کے مستحق نہیں، شاہراہوں،چوراہوں اہم مقامات پر ڈیرے ڈالنے والے بھکاریوں کے خلاف موثر کارروائیاں کریں۔