کراچی (مانیٹرنگ ڈیسک) لاڑکانہ سے تعلق رکھنے والے ایک فراڈیے نے سندھ کے غریب افراد کو یوتھ افیئر کے دفتر میں نوکری دلوانے کی لالچ دے کر لاکھوں روپے اینٹھ لیے۔ اس فراڈ سے درجنوں افراد شکار ہوئے۔ روزنامہ جنگ میں اسد ابن حسن کی خبر کے مطابق مذکورہ فراڈیا (میر او شاق علی شیخ)
کا شناختی کارڈ لاڑکانہ سے جاری ہوا جس پر عارضی پتہ اسلام آباد کا ہے اور مستقل پتہ لاڑکانہ کا ہے۔دستاویزات کے مطابق مذکورہ شخص اپنے آپ کو پاکستان تحریک انصاف سے بہت قریب ظاہر کرتا ہے۔ وہ جب اپنے شکار سے بات کرتا تو اس کے موبائل واٹس ایپ پر پارٹی کے لیڈران کے ساتھ کھینچی گئی فوٹو کی ڈی پی ظاہر ہوتی تھی۔اس حوالے سے سندھ کے وزیر برائے یوتھ افیئرز کے پی ایس، سندھ یوتھ افیئرز سیکریٹریٹ اور اسلام آباد سیکرٹریٹ میں جبکہ سندھ میں اسی حوالے سےتعنیات ایک اسسٹنٹ ڈائریکٹر سے بھی رابطے ہوئے سب نے حیرت کا اظہار کرتے ہوئے اس نام کے شخص کا ادارے سے تعلق حوالے سے قطعی انکار کیا۔ تاہم اوشاق سے اس کے نارمل موبائل نمبر پر متعدد بار فون کیے گئے اس کو واٹس ایپ پر بھی کال اور میسج کیا گیا کہ” آیا وہ سندھ یوتھ افیئرز کا فوکل پرسن ہے”۔ میسج پڑھنے کے باوجود نہ اس نے میسج کا جواب دیا اور نہ ہی کال بیک کی۔
