لاہور ( این این آئی) زمبابوین شائقین کرکٹ کی جانب سے ٹرول کیے جانے پر مسٹر پاک بین کے نام سے مشہور آصف محمد نے انہیں پیار بھرا جواب دیا ہے۔ٹی ٹونٹی ورلڈ کپ 2022ء کے پاکستان اور زمبابوے کے میچ سے قبل ہی سوشل میڈیا پر ماحول گرم ہوگیا تھا۔زمبابوے
کے شائقین کرکٹ کی جانب سے یہ کہا جا رہا تھا کہ پاکستان نے 2016ء میں زمبابوے کے ایک شو میں مسٹر بین کے ہمشکل کو بھیج کر دھوکا کیا گیا ہے اور اب زمبابوین اس کا بدلہ پاکستان کو ہرا کر لیں گے۔بدلے کی آگ میں سلگتے زمبابوین شائقین کرکٹ نے اس دوران پاکستان اور مسٹر پاک بین کو خوب ٹرول بھی کیا۔مائیکرو بلاگنگ پلیٹ فارم ٹوئٹر پر پاکستانی ریڈیو براڈ کاسٹر اور وائس اوور آرٹسٹ عادل خان نے اس ٹرولنگ کا جواب مسٹر پاک بین کی ویڈیو شیئر کر کے دیا ہے۔اس ویڈیو میں مسٹر پاک بین کے نام سے مشہور آصف محمد نے سوشل میڈیا پر ہونے والی ٹرولنگ اور زمبابوے شائقین کرکٹ کے شکوے شکایات کو دور کرنے کی خاطر انہیں پیار بھرا پیغام دیا ہے۔ویڈیو میں مسٹر پاک بین نے زمبابوے کے شائقین کرکٹ سے مخاطب ہو کر کہا ہے کہ میرے پیارے دوستو! مجھے زمبابوے بہت پسند ہے، آئی لو یو زمبابوین۔مسٹر پاک بین نے یہ بھی کہا ہے کہ میچ دیکھنے کے لیے آنے والے تمام زمبابوین، پاکستانیوں اور دیگر ملکوں سے آئے ہوئے لوگوں کو میرا پیار۔واضح رہے کہ عادل خان نے یہ ویڈیو پاکستان اور زمبابوے کے میچ کے دوران شیئر کی تھی جو پاکستان کی زمبابوے کے ہاتھوں1 رن سے شکست کے بعد اب وائرل ہوئی ہے۔
