لندن(امین این آئی) پاکستان مسلم لیگ (ن) کے رہنما نامزد وزیر خزانہ اسحاق ڈار نے کہا ہے کہ پاکستان کو دوبارہ اسی بلندی پر لے جائیں گے جس پر نواز شریف کے دور حکومت میں تھا۔ذرائع کے مطابق اسحاق ڈار (آج) منگل کو سینیٹر کا حلف اٹھائیں گے

،(کل)بدھ کو بطور وزیر خزانہ کا عہدہ سنبھالیں گے۔پاکستان روانگی سے قبل میڈیا سے گفتگو کرتے ہوئے اسحاق ڈار نے کہا کہ اللہ کا کرم ہے کہ جس دفتر سے میں میڈیکل کیلئے آیا تھا اللہ تعالیٰ مجھے اسی دفتر میں واپس بلارہا ہے۔انہوں نے کہا کہ ہم نواز شریف کی قیادت میں ملک کو ایسی پوزیشن پر لے گئے تھے کہ جہاں ہم دنیا کی 18 ویں معیشت بننے جارہے تھے، خدا مجھے توفیق دے تو پاکستان کو دوبارہ اسی بلندی پر لے جائیں۔انہوں نے کہا کہ نواز شریف کے دور میں کم شرح سود تھی، شرح نمو بلند تھی، روپیہ مستحکم تھا، ہماری کوشش ہوگی کہ ہم معیشت کو نیچے سے اوپر لے جائیں، جس کے لیے پہلے گرتی ہوئی اکانومی کو روکیں گے پھر اس کی سمت تبدیل کریں گے خدا ہمیں اس کی توفیق دے۔اپنے مقدمے کے حوالے سے انہوںنے کہاکہ مجھ پر بنایا گیا مقدمہ بے بنیاد تھا، مجھ پر بیس سال کے ٹیکسز جمع نہ کرانے کا الزام عائد کیا گیا جب کہ میں نے کبھی بیس دن بھی ٹیکس ڈیلے نہیں کیا۔