لاہور، اسلام آباد( این این آئی) شہباز شریف خاندان کے خلاف منی لانڈرنگ کیس کے مبینہ شریک ملزم ملک مقصود کے کزن صغیر احمد اعوان نے کہاہے کہ ملک مقصود کے بارے میں جو کچھ کہا جارہا ہے وہ غلط ہے، ہم چپڑاسی نہیں قطب شاہی اعوان ہیں۔ گفتگو کرتے ہوئے انہوں نے کہا کہ عمران خان، فواد چوہدری اور شہباز گل کی اپنی کوئی زبان نہیں۔
صغیر اعوان نے کہا کہ ملک مقصود اپنے کزن کے پاس رہتا تھا، پہلی بار اسے دل کی تکلیف ہوئی تو ڈاکٹر کے پاس گئے،ملک مقصود غریب آدمی تھا، میں حلفیہ کہتا ہوں ملک مقصود کی موت دل کا دورہ پڑنے سے ہوئی ہے۔دوسری جانب سفارتی ذرائع نے کہاہے کہ دبئی میں انتقال کر جانے والے پاکستانی ملک مقصود کی میت 11 جون کو پاکستان بھیجی جائے گی۔سفارتی ذرائع نے بتایا کہ قومی ایئر لائن میں میت لے جانے کی بکنگ کرادی گئی ہے۔ذرائع کے مطابق میت کے ساتھ ملک مقصود کے کزن ملک عثمان کی بھی روانگی کا امکان ہے۔واضح رہے کہ دبئی پولیس کی جانب سے ملک مقصود احمد کے جاری کیے گئے ڈیتھ سرٹیفیکیٹ کے مطابق موت طبی ہے۔ذرائع کے مطابق یہ ڈیٹھ سرٹیفکیٹ اسی مقصود چپراسی کا ہے جس کا نام وزیراعظم شہباز شریف اور وزیر اعلیٰ پنجاب حمزہ شہباز کے خلاف منی لانڈرنگ کیس کے چالان میں بھی استعمال ہوا ہے۔پی ٹی آئی رہنما فرخ حبیب نے اس بات کی تصدیق کی کہ دبئی میں انتقال کر جانے والے ملک مقصود احمد ہی اصل میں مقصود چپڑاسی ہیں۔
