پاکپتن /لاہور(این این آئی)پاکپتن سے مسلم لیگ (ن) کے رکن پنجاب اسمبلی میاں نوید کے والد کو ان کے گھر پر قتل کردیا گیا، رکن اسمبلی کو واقعے کی اطلاع لاہور میں ملی جس کے بعد وہ فوری طو رپر آبائی علاقے کے لئے روانہ ہو گئے،وزیراعلی پنجاب حمزہ شہباز شریف نے واقعے کا

نوٹس لیتے ہوئے آئی جی پنجاب سے رپورٹ طلب کرلی۔پولیس کے مطابق رکن پنجاسب اسمبلی میاں نوید علی کے والد رانا احمد علی کو گھر میں قتل کیا گیا۔پولیس کے مطابق 2 نامعلوم افراد نے رانا احمد علی کو بیڈ روم میں گھس کر گولیاں ماریں، رانا احمد علی آرائیں فلور ملز ایسوسی ایشن کے رہنما تھے۔رکن اسمبلی میاں نوید علی نے بتایا کہ وہ لاہور میں موجود تھے جب گھریلو ملازمین نے ٹیلیفون پر والد کے قتل کی اطلاع دی،جائے وقوعہ سے گولیوں کے خول بھی ملے ہی۔وزیراعلی پنجاب حمزہ شہباز شریف نے واقعے کا نوٹس لیتے ہوئے آئی جی پنجاب سے رپورٹ طلب کرلی۔ حمزہ شہباز نے میاں نوید کے والد کے قتل کو افسوسناک قرار دیتے ہوئے اسے پنجاب پولیس کے لئے ٹیسٹ قرار دیتے ہوئے ملزمان کی فوری گرفتاری کی ہدایت بھی کی ہے۔آئی جی پنجاب راؤ سردار نے آر پی او ساہیوال سے واقعہ کی رپورٹ طلب کرتے ہوئے سینئر افسران کو موقع پر پہنچنے کا حکم دیا۔آئی جی پنجاب نے کہا کہ واقعہ کے حقائق سامنے لاتے ہوئے ملزمان کو جلد از جلد گرفتار کیا جائے، قانونی تقاضے پورے کرتے ہوئے ملزمان کو قرار واقعی سزا دلوائی جائے۔را ؤسردار نے کہا کہ لواحقین کو انصاف کی فراہمی ترجیحی بنیادوں پر یقینی بنائی جائے۔