اسلام آباد (این این آئی)مسجد نبوی ؐ میں گزشتہ روز پیش آنے والے واقعے پر قومی سابق کرکٹرز شاہد آفریدی اور محمد یوسف نے کہا ہے کہ ہم اپنی سیاسی دشمنیاں نبھانے کیلئے حرم کی حرمت تک بھول گئے۔شاہد آفریدی نے اپنے ٹوئٹ میں کہا کہ روضہ رسول ؐ وہ جگہ ہے جہاں آواز بلند کرنے کی بھی ممانعت ہے، ہم اپنی سیاسی دشمنیاں نبھانے کیلئے حرم کی حرمت تک بھول گئے۔انہوں نے کہا کہ ہم ریاست مدینہ کے تقدس سے بھی منکر ہوگئے، نعرے لگانے والوں کی پہچان تو ہوجائیگی لیکن پاکستان کی شناخت کو ناقابل تلافی نقصان پہنچا ہے۔ دوسری جانب سابق کرکٹر محمد یوسف نے اپنے ٹوئٹ میں کہا کہ میں نے تو کبھی مکہ مدینہ نہیں دیکھا تھا، مسلمان ہونے کے بعدپہلی دفعہ گیا تو خانہ کعبہ کو دیکھ کر چیخ نکل گئی تھی۔محمد یوسف نے کہا کہ روضہ رسولؐپر گیا تو آنکھوں سے آنسو جاری ہوگئے تھے، یہ وہ جگہیں ہیں جہاں پہنچ کر رونگٹے کھڑے ہوجاتے ہیں۔اْنہوں نے کہا کہ آج روضہ رسول ؐ پر جو کچھ ہوا وہ دیکھ کر اے اللّہ میں پوری امت کی طرف سے تجھ سے معافی مانگتا ہوں۔