اسلام آباد(مانیٹرنگ ڈیسک/آن لائن ) ترین گروپ نے پنجاب کابینہ کے اجلاس کے بائیکاٹ کا اعلان کردیا، حکومت پنجاب کی جانب سے ترین گروپ کے وزرا کو اجلاس میں شرکت کے لئے لئے منانے کا سلسلہ جاری ہے ۔نجی ٹی وی دنیا کے مطابق ترین گروپ نے باہمی مشاورت سے
پنجاب کابینہ کے آج ہونے والے اجلاس کے بائیکاٹ کا فیصلہ کیا، ترین گروپ کے مرکزی رہنما عون چوہدری کا کہنا ہے کہ مانئس عثمان بزدار کے مطالبے پر قائم ہیں، عثمان بزدار کی زیر صدارت کسی بھی اجلاس میں شرکت نہیں کرینگے، پنجا ب کابینہ میں ترین گروپ کے دو وزرا اورچار ایڈوائزر شامل ہیں۔دوسری جانب حکومت پنجاب کی جانب سے ترین گروپ کے وزرا کو منانے کی بدستور کوشش کی جارہی ہے، اس ضمن میں اہم وزرا کو ٹاسک دے دیاگیا ہے کہ ترین گروپ کے وزرا کو کابینہ اجلاس میں شرکت کے لئے منایاجائے ، پنجاب کابینہ کااجلاس آج شام ساڑھے چھ بجے عثمان بزدار کی زیرصدار ت ہوگا جس میں نو نکاتی ایجنڈا زیر غور آئے گا۔علاوہ ازیں نجی ٹی وی کے پروگرام میں گفتگو کرتے ہوئے عون چوہدری نے کہا کہ ابھی یہ طے نہیں ہوا کہ پنجاب میں ہونے کیا جارہا ہے، ہم صورت حال دیکھ کر اپنا فیصلہ کریں گے۔خیال رہے کہ اس سے قبل ترین گروپ کی حکومتی شخصیات سے ملاقات کی اندرونی کہانی سامنے آ ئی تھی جس سے متعلق ذرائع نے دعویٰ کیا تھا کہ ترین گروپ نے ایک بار پھر وزیراعلیٰ پنجاب عثمان بزدار کی تبدیلی کا مطالبہ کر دیا ہے۔ذرائع کا کہنا تھا کہ وزیر تعلیم پنجاب مراد راس کی قیادت میں حکومتی ٹیم نے ترین گروپ سے مذاکرات کیے۔
