اسلام آباد (مانیٹرنگ ڈیسک ) اقوام متحدہ نے 15مارچ کو اسلامو فوبیا کیخلاف عالمی دن قرار دیدیا۔ اس حوالے سے وزیراعظم کے معاون خصوصی شہباز گل نے عمران خان کی کامیابی قرار دیتے ہوئے کہا ہے کہ جو کام دنیا کے مسلمان لیڈر مل کر بھی نہ کر سکے وہ وزیراعظم عمران خان نے کر دکھایا

۔ سماجی رابطے کی ویب سائٹ ٹویٹر پرشہباز گل نے کہا ہے کہ الحمداللہ!75سالوں میں جو کام پوری دنیا کے مسلمان لیڈر نہ کر سکے،وہ کام پاکستان کے بیٹے عمران خان نے کر دکھایا۔ واضح رہےوزیراعظم عمران خان نے کہا ہے کہ میں آج امت مسلمہ کو مبارکباد دینا چاہتا ہوں کیونکہ اسلامو فوبیا کی بڑھتی ہوئے لہر کے خلاف ہماری آواز سنی گئی ہے اور اقوام متحدہ نے پاکستان کی طرف سے متعارف کرائی گئی ایک تاریخی قرارداد منظور کی ہے جس میں 15 مارچ کو اسلامو فوبیا سے نمٹنے کا عالمی دن قرار دیا گیا ہے۔ وزیراعظم نے سماجی رابطوں کی ویب سائٹ ٹوئٹر پر اپنے ٹویٹ میں کہا ہے کہ آج اقوام متحدہ نے بالآخر دنیا کو درپیش سنگین چیلنج کو تسلیم کر لیا ہے۔اگلا چیلنج اس تاریخی قرارداد پر عمل درآمد کو یقینی بنانا ہے جس کے تحت اسلامو فوبیا، مذہبی علامات اور طریقوں کا احترام اور مسلمانوں کے خلاف منظم نفرت انگیز تقریر اور امتیازی سلوک کو کم کرناہے۔