کراچی (این این آئی)سندھ اسمبلی میں فیصل واوڈا کی خالی سینیٹ نشست پر پاکستان پیپلز پارٹی کے نثار کھوڑو کامیاب ہوگئے ہیں۔سینیٹ کی ایک خالی نشست پر پولنگ کا وقت صبح 9 بجے سے شام 4 بجے تک رکھا گیا تھا۔سینیٹ کی خالی نشست پر پیپلز پارٹی کے نثار کھوڑو

اور تحریک انصاف کے آغا ارسلان کے علاوہ 2 آزاد امید وار عاجز دھامرا اور گل محمد جاکھرانی مدمقابل تھے، دونوں آزاد امیدواروں کا تعلق پیپلز پارٹی سے تھا جب کہ تحریک انصاف کے کورنگ امیدوار علی احمد پلھ الیکشن سے دستبردار ہوگئے تھے۔تحریک انصاف متحدہ قومی موومنٹ پاکستان اور جے ڈی اے نے پولنگ میں حصہ نہیں لیا۔غیر سرکاری غیر حتمی نتائج کے مطابق نثار کھوڑو 99 ووٹ لے کر کامیاب قرار پائے۔تحریک انصاف کے بائیکاٹ کے باوجود تحریک انصاف کے 4 ارکان نے پولنگ میں حصہ لیا، جن مین سے 2 نے پیپلز پارٹی کے امیدوار کو ووٹ دیا ہے۔پولنگ کے دوران پیپلز پارٹی نے سندھ اسمبلی کے احاطے میں اپنے ارکان کے لیے پہلے ناشتے اور پھر ظہرانے کا اہتمام کررکھا تھا۔واضح رہے کہ فیصل واوڈا 2021 میں سندھ سے سینیٹ کی جنرل سیت پر کامیاب ہوئے تھے تاہم 2018 کے عام انتخابات کے لیے کاغذات نامزدگی کے ساتھ دہری شہریت کے معاملے پر جھوٹا حلف نامہ جمع کروانے پر الیکشن کمیشن نے انہیں نااہل قرار دے دیا تھا۔