مظفرآباد(این این آئی)پی ٹی آئی حکومت کا مہاجرین پر پہلا وار ، فیس معافی کی چھوٹ ختم ،آزادجموں وکشمیر یونیورسٹی نے فیسوں میں رعایت نہ دیے جانے کا حکم جاری کر دیا،تفصیلات کے مطابق حکومت آزادکشمیر نے 24نومبر1992کونوٹیفکیشن زیر نمبر س ب
2481-90 کے تحت آزادکشمیر کے مختلف تعلیمی ادارہ جات سکولز،کالجز ،یونیورسٹیز میں زیر تعلیم مہاجرین طلبہ کو داخلہ،امتحانی اور ٹیوشن فیس سے مستثنیٰ قرار دیا تھا،ملک پاکستان کیلئے اپنے جان و مال کی قربانی دینے والے ان مہاجرین طلبہ کو اعلیٰ تعلیم کے حصول میں حکومت نے جو سہولیات دی تھیں موجودہ حکومت نے اقتدار میں آتے ہی ختم کر دی ،آزادجموں وکشمیر یونیورسٹی نے 10ستمبر2021 کو حکم زیر نمبر 339-48/جنرل /کے تحت یہ سہولت ختم کر دی ہے ،حکم میں کہا گیا ہے کہ” وائس چانسلر نے حسب سفارش فیس و فنڈز کمیٹی مہاجرین طلبہ و طالبات جو کہ ایم فل ،پی ایچ ڈی میں زیر تعلیم ہیں ان کو کسی قسم کی فیس میں رعایت نہ دیے جانے کی منظوری صادر فرمائی ہے”،آزادجموں وکشمیر یونیورسٹی کی جانب سے مہاجرین طلبہ کی فیسوں میں چھوٹ ختم کرنے کے حکم پر مہاجرین طلبہ میں تشویش کی لہر دوڑ گئی ہے ،مہاجرین طلبہ نے مہاجرین اسمبلی نشستوں سے منتخب ہونے والے ممبران اسمبلی اور حکومتی نمائندگان سے اس سلسلہ میں فوری کردار ادا کرنے کی اپیل کی ہے۔
