ممبئی (این این آئی )بھارتی ریاست مہاراشٹرا سے تعلق رکھنے والی 70سالہ متھورا بائی کی جانب سے دعویٰ کیا جارہا ہے کہ کورونا ویکسین کی پہلی ڈوز لگوانے کے بعد ان کی کھوئی ہوئی بینائی واپس آگئی ہے۔بھارتی میڈیا رپورٹس کے مطابق ملک میں ویکسین کو لے کر لوگوں میں پائی جانے والی غلط فہمیاں تاحال اختتام پذیر نہیں ہوسکی ہیں، بھارت میں عالمی وبا کی دوسری لہر کی بگڑتی صورتحال کے باوجود بھی لوگ ویکسین نہیں لگوارہے۔تاہم مہاراشٹرا کی رہائشی متھورا بائی کا کہنا تھا کہ ان کی آنکھوں کی بینائی موتیا کے سبب چلی گئی تھی اور وہ گزشتہ 9سالوں سے اپنی زندگی اندھیرے میں گزار رہی تھیں۔خاتون کی جانب سے کیے گئے دعوے کے مطابق کووڈ ویکسین کی ایک ڈوز لگوانے کے بعد ان کی ایک آنکھ کی بینائی 30سے 40فیصد تک واپس آچکی ہے۔