اسلام آباد(اے پی پی)دفتر خارجہ نے وزیر اعظم کے سابق معاون خصوصی برائے اوورسیز پاکستانیز سید ذوالفقار بخاری کے مبینہ دورہ اسرائیل کے حوالے سے میڈیا رپورٹس کو مسترد کرتے ہوئے اسے بے بنیاد اور گمراہ کن قرار دیا ہے اور کہا ہے کہ اسرائیل کا ایسا کوئی دورہ نہیں کیا گیا ہے۔ ترجمان دفتر خارجہ نے ایک بیان میں کہا کہ اس سلسلے میں ، سابق معاون خصوصی نے بھی ایک بیان میں اس بے بنیاد الزام کو یکسر مسترد کیا ہے۔قبل ازیں وزارت خارجہ نے 18 دسمبر 2020 کو بھی اسی طرح کی غلط خبروں کو مسترد کردیا تھا۔ترجمان کا کہنا ہے کہ پہلے بھی بتایا گیا تھا کہ پاکستان کی اصولی موقف میں کوئی تبدیلی نہیں ائی ہے۔ پاکستان 1967 سے قبل کی سرحدوں اور القدس شریف کو فلسطینی ریاست کے دارالحکومت کے طور پر دو ریاستی حل پر زور دیتا رہا ہے۔