کراچی ،لاہور (مانیٹرنگ ڈیسک،این این آئی)پی ٹی آئی رہنما فیصل واوڈا کے استعفے سے خالی ہونے والی نشست این اے 249 میں ضمنی انتخاب کے لیے پولنگ جاری ہے۔ میڈیا رپورٹس کے مطابق ضمنی الیکشن میں مبینہ انتخابی دھاندلی کی شکایات ابھی سے موصول ہونا

شروع ہو گئی ہیں۔بلدیہ کے پولنگ اسٹیشن 225 میں ووٹرز نے عملے پر بلے پر مہر لگوانے کا الزام عائد کیا ہے۔پولنگ اسٹیشن 225 میں خواتین سے زبردستی ووٹ کاسٹ کرانے کی شکایات بھی موصول ہوئی ہیں۔پیپلزپارٹی کا کہنا ہے کہ ہماری خواتین ووٹرز کو ہراساں کیا جارہا ہے۔خواتین کو زبردستی بلے پر مہر لگانے کا کہا جا رہا ہے۔ووٹرز کا کہنا ہے کہ ہماری مرضی جس کو بھی ووٹ دیں لیکن بلے پر مہر لگانے کے لیے کہاں جا رہا ہے۔دریں اثنا مسلم لیگ (ن ) کے صدر شہباز شریف نے کہا ہے کہ عوام ووٹ کے آئینی و جمہوری حق کو استعمال کریں، عوام ووٹ کی طاقت استعمال کر کے دیانتدار قیادت منتخب کرسکتے ہیں۔شہباز شریف نے اپنے بیان میں کہا ہے کہ مسلم لیگ (ن) نے عوام کے اعتماد کو کبھی ٹھیس نہیں پہنچائی، ہمارا ریکارڈ ہمیشہ وعدوں کو پورا کرنے کا رہا ہے، عوام ماضی کی طرح ایک بار پھر درست فیصلہ کریں گے، یقین دلاتا ہوں آپ کے بنیادی مسائل انشا اللہ لازمی حل ہوں گے۔شہباز شریف کا کہنا تھا کہ کورونا وبا کے پھیلا ئوکے پیش نظر اپنا اور اپنے اردگرد دیگر افراد کا خیال رکھیں، ماسک پہن کر اپنی جان کی حفاظت کریں اور شیر کو ووٹ ڈال کر اپنے مستقبل کو محفوظ بنائیں۔