اسلام آباد(نیوز ڈیسک)متحدہ عرب امارات میں سوشل میڈیا پر غیر ذمہ دارانہ بیانات یا دیگر مواد پوسٹ کرنے والوں کے خلاف سخت کاروائی جاری ہے لیکن ایک آسٹریلوی خاتون کا کہنا ہے کہ اسے محض ایک معصوم سی تصویر پوسٹ کرنے پر گرفتار کرکے جیل میں ڈال دیا گیا ہے۔امریکی ٹی وی ABC کے مطابق 39سالہ جوڈی میگی نے اپنے اپارٹمنٹ کے سامنے معذوروں کی پارکنگ کیلئے مختص دو جگہوں پر کھڑی کی گئی گاڑی کی تصویر بنا کر فیس بک پر پوسٹ کی تھی، جس پر ان کے خلاف شکایت کردی گئی اور انہیں ابو ظبہی کی ایک عدالت میں پہنچا دیا گیا۔ اخبار کے مطابق جوڑی نے گاڑی کی لائسنس پلیٹ سمیت کوئی بھی ایسی معلومات تصویر میں ظاہر نہ کی تھیں کہ جن کی بناپر کسی کی شناخت ظاہر ہو لیکن اس کے باوجود انہیں کسی شخص کے خلاف سوشل میڈیا پر بری باتیں لکھنے کے جرم میں گرفتار کرلیا گیا ہے۔ جوڈی نے اخبار کو بتایا کہ وہ بالکل نہیں جانتیں کہ ان کا جرم کیا ہے۔ ان کا کہنا ہے کہ انہوںنے تو محض انٹرنیٹ استعمال کیا تھا۔جوڈی کے بلاگ کے مطابق وہ 2012میں ابو ظبہی آئیں اور وہ مقامی خواتین کو گرافک ڈیزائیننگ کی تعلیم دیتی ہیں، جبکہ اپنے آرٹ پراجیکٹس پر بھی کام کرتی ہیں۔ فیس بک پوسٹ پر جیل پہنچنے والی جوڈی کا کنا ہے کہ انہیں معلوم نہیں کہ کب تک وہ قید میں رہیں گی، تاہم کچھ میڈیا رپورٹس کے مطابق انہیں جرمانے کی وصولی کے بعد ملک بدر کیا جاسکتا ہے۔