اسلام آباد (این این آئی)احتساب عدالت اسلام آباد نے جعلی بینک اکاؤنٹس سے جڑے پارک لین ریفرنس میں نامزد ملزم سابق صدر آصف علی زرداری سمت دیگر ملزمان پر فرد جرم عائد کرنے کا فیصلہ کرتے ہوئے آصف زرداری کی جانب سے پارک لین ریفرنس خارج کرنے اور عدالتی دائرہ اختیار کے متعلق درخواستیں مسترد کردیں۔جمعہ کو پارک لین ریفرنس کیس کی سماعت اسلام آباد کی احتساب عدالت کے جج محمد اعظم خان نے کی۔

سابق صدر آصف زرداری کے وکیل فاروق نائیک کا موقف تھا کہ کیس پیسوں کی لین دین کا ہے، سمٹ بینک اور نیشنل بینک نے پہلے ہی بینکنگ کورٹ میں مقدمہ دائرکیا ہوا ہے؟ دونوں بینکوں نے آصف زرداری کو فریق ہی نہیں بنایا ہے، نہ جانے نیب کیوں آصف زرداری کے پیچھے پڑگیا ہے۔فاروق ایچ نائیک نے عدالت سے آصف علی زرداری کی بریت اور ریفرنس خارج کرنے کی درخواست واپس لینے کی استدعا کی تاہم نیب نے بریت کی درخواست خارج کرتے ہوئے فردجرم عائد کرنے کی استدعا کی۔ڈپٹی پروسیکیوٹر جنرل نیب سردار مظفر عباسی نے کہا کہ تمام دلال مکمل ہونے کے بعد درخواست واپس نہیں لی جاسکتی۔اس موقع پر عدالت نے پارک لین ریفرنس میں نیب کے دائرہ اختیار پر فیصلہ محفوظ کرلیا۔بعد ازاں جج محمد اعظم خان نے پارک لین ریفرنس میں محفوظ شدہ فیصلہ سناتے ہوئے پارک لین ریفرنس خارج کرنے اورعدالتی دائرہ اختیار پر سابق صدر آصف زرداری کی دونوں درخواستیں مسترد کر دیں۔سابق صدر آصف علی زرداری نے ریفرنس خارج کرنے کی درخواست میں موقف اختیار کیا تھا کہ یہ کیس ان پر نہیں بنتا پارک لین ریفرنس خارج کر کے بری کیا جائے۔دوسری درخواست میں موقف اختیار کیا گیا تھا کہ پارک لین ریفرنس نیب قانون نہیں بلکہ مالیاتی قوانین کا کیس ہے۔احتساب عدالت نے دس اگست کو آصف علی زرداری سمت تمام ملزمان پر فرد جرم عائد کرنے کا فیصلہ سناتے ہوئے کہا کہ اس فیصلہ کا تحریری حکم نامہ آج ہی ضروری ہدایات کے ساتھ جاری کریں گے۔اس سے قبل عدالت نے وڈیو لنک کے ذریعے فرد جرم عائد کرنے کا حکم دے رکھا تھا۔آصف زرداری کی جانب سے متفرق درخواستوں کے باعث فرد جرم عائد کرنے کی کارروائی موخر کردی گئی تھی۔ ایک نجی ٹی وی چینل کی رپورٹ کے مطابق 10 اگست کو فرد جرم عائد کی جائے گی۔