اسلام آباد (این این آئی)وزیراعظم عمران خان نے وفاقی کابینہ کا آج منگل کو طلب کر لیا ،اجلاس میں 9 نکاتی ایجنڈے پر غور کیا جائے گا۔ ایجنڈا کے مطابق بلوچستان میں واپڈا کی طرف سے 80 ارب روپے لاگت سے گزشتہ 15 سال سے زیر تعمیر کچی کینال میں اربوں روپے کی کرپشن کی تحقیقات ایف آئی اے سے نیب کے حوالے کرنے پر غور کیا جائے گا۔ ذرائع کے مطابق مسلم لیگ (ن )کی حکومت میں
اربوں روپے کرپشن کی تحقیقات کرنے کیلئے معاملہ 2016 میں ایف آئی اے کے حوالے کیا تھا ،وزارت آبی وسائل ایف آئی اے کی تحقیقات کی پیش رفت سے مطمئن نہیں ۔ ایجنڈا کے مطابق اجلاس میں ممنوعہ بور کے اسلحہ لائسنس جاری کرنے پر غور کیا جائے گا،وزارت داخلہ کی غیر ممنوعہ بور کے اسلحہ لائسنس جاری کرنے کی سمری کی منظوری دی جائے گی ،متروکہ املاک وقف بورڈ کی ٹاسک فورس کی سفارشات کی منظوری دی جائے گی ،شہروں میں متروکہ املاک وقف بورڈ کی املاک کو تعلیم صحت اور سماجی کاموں میں استعمال میں لانے کیلئے قانون میں ترمیم کی منظوری دی جائے گی ،ملک کے کم ترقی یافتہ علاقوں میں ٹیلی کام کی جدید سہولیات فراہم کرنے کیلئے انفراسٹرکچر بچھانے کی منظوری دی جائے گی ،نادرا کو عالمی غیر سرکاری تنظیم آئی ایم او کے ساتھ تعاون کے معائدے کرنے کی منظوری دی جائے گی ،وفاقی کابینہ سرکاری کمپنی سینڑل پاور پرچیز کمپنی کے چیف ایگزیکٹیو تعینات کرنے کی منظوری دے گی ۔ ذرائع کے مطابق کمپنی گزشتہ ایک سال سے بغیر کسی کل وقتی سربراہ کے کام کر رہی ہے ،گردشی قرض کے خاتمے کیلئے کمپنی کا مستقبل سربراہ ہونا بہت ضروری ہے ۔وفاقی کابینہ کابینہ کی توانائی کی کمیٹی کے فیصلوں کی بھی توثیق کرے گی۔
