اسلام آباد(آن لائن ) ترجمان(ن) لیگ مریم اورنگزیب نے کہاہے کہ عمران مافیا ڈرامے اور ٹوئٹ کرکے اپنی چوری نہیں چھپا سکتا۔پاکستان مسلم لیگ (ن) کی ترجمان مریم اورنگزیب نے وزیراعظم عمران خان کے بیان پر ردعمل کا اظہار کرتے ہوئے کہا کہ عمران صاحب عوام کے ساتھ صبح صبح فجر کے وقت بھی جھوٹ، عمران مافیا ڈرامے اور ٹوئٹ کرکے اپنی چوری نہیں چھپا سکتا،
عمران مافیا کے قیمتیں بڑھانے پرمسلسل توجہ مرکوز رکھنے کے نتیجے میں سبزیوں کی قیمتوں میں واضح اضافہ ہوا ہے، عمران صاحب ٹوئٹ صبح کریں، دن میں، شام یا رات کو لیکن جھوٹ تو جھوٹ ہی رہتا ہے، عوام جانتے ہیں کہ دانستہ طور پر مہنگائی عمران مافیا نے کی ہے۔مریم اورنگزیب نے کہا کہ عمران خان جہانگیر ترین اور خسرو بختیار نے آپ کی سربراہی میں عوام کا آٹا اور چینی چوری کی، آٹا اور چینی چور عناصر کو سزا دینا ہے تو وزیراعظم سمیت خسرو بختیار اور جہانگیر ترین کو سلاخوں کے پیچھے ہونا چاہیے، آپ عمران مافیا کی آٹا، چینی اور روٹی پر ڈاکے کی رپورٹ عوام کے سامنے نہیں لا سکے۔
