اسلام آباد(مانیٹرنگ ڈیسک) بھارتی وزیراعظم نریندر مودی جو اکثر پاکستان مخالف بیان جاری کرتے رہتے ہیں، ان کی پاکستان کے خلاف ایک ہرزہ سرائی پر وفاقی وزیر فواد چوہدری نے سماجی رابطے کی ویب سائٹ ٹوئٹر پر ردعمل میں کہا کہ ”انڈین لوگوں کو مودی کے پاگل پن کو شکست دینا ہوگی، مودی سرکار ایک اور الیکشن کی وجہ سے خطے کے امن کو داؤ پر لگا رہی ہے، اصل بات یہ ہے کہ کشمیر کی صورت حال اور شہریت بل پر

اندرون اور بیرون ملک پڑنے والا پریشر مودی حکومت برداشت نہیں کر سکی“۔ فواد چوہدری کے اس بیان پر بھارتی میڈیا جل بھن گیا، انہوں نے باقاعدہ اس معاملے پر نشریات کا آغاز کر دیا اور ہرزہ سرائی کا مزید سلسلہ شروع کرتے ہوئے ایک چینل نے کہا کہ اب پاکستان والے مشورہ دے رہے ہیں کہ کسے ووٹ دینا ہے اور کسے نہیں دینا۔ اس طرح فواد چوہدری کے اس ٹوئٹر پیغام نے بھارتی میڈیا میں آگ لگا دی ہے، جس پر ردعمل جاری ہے۔