لاہور(این این آئی) پاکستان مسلم لیگ (ن) کی مرکزی سیکرٹری اطلاعات مریم اورنگزیب نے کہا ہے کہ عمران صاحب کی پالیسیوں سے عوام تنگ اور بیزار ہیں، ان کے اے ٹی ایم امیر تر لیکن پاکستانی غریب ترہوچکے ہیں،قائداعظم سے محمد نوازشریف تک ہمارے رہنماؤں کا درس ہے کہ سیاسی مخالفین کا بھی احترام کریں اور تضحیک یا توہین کا رویہ نہ اپنائیں۔ ٹوئٹر پر اپنے بیان میں مریم اورنگزیب نے کہا کہ ہمارے کلچر، تہذیب و اقدار
میں سیاسی مخالفین کی تضحیک یا توہین کی کوئی گنجائش نہیں، وزیراعظم اور ان کے حواریوں کا رویہ مخالفین کی تضحیک اورتوہین والا ہے جسے وہ نہ صرف فخر سے بیان کرتے ہیں بلکہ اپنے لئے باعث عزت بھی سمجھتے ہیں۔ انہوں نے اپنے کارکنوں کو ہدایت کی کہ اس کے باوجود ہمیں ان کی سطح پرنہیں گرنا چاہیے، عمران صاحب کی نالائقی و نااہلی کی پالیسیوں پر احتجاج و تنقید کرتے ہوئے احترام کا دامن ہاتھ سے نہ جانے دیں۔
