اسلام آبا(نیوزڈیسک) برطانیہ کے سب سے بڑے خاندان کے سربراہ ریڈ فورڈ ایک اور بچے کے باپ بن گئے ہیں۔ ننھی پری کی آمد کے ساتھ ہی سو اور نوئل ریڈفورڈ کے بچوں کی کل تعداد18ہوگئی ہے۔ نوزائیدہ بچے کا نام ہیلی ایلفیا رکھا گیا ہے۔ مسز ریڈفورڈ نے اپنی بیٹی کی پیدائش کی اطلاع اپنی ویب سائٹ پر دی ہے اور کہا ہے کہ 7پونڈ15اونس کی ہیلی مکمل طور پر صحت مند ہیں۔ یہ خاندان لنکاشائر میں بیکری کا مالک ہے اور خاندان کی کفالت اپنے زور بازو پر کرتا ہے۔ قبل ازیں حکومت اور دیگر این جی اوز کی جانب سے انہیں مالی تعاون کی پیشکش کی جاچکی ہے تاہم ریڈ فورڈ نے ایسی پیشکش شکریئے کے ساتھ مسترد کردی ہیں۔ فی الوقت ریڈفورڈز خاندان کا سب سے بڑا بچہ کرس26برس کا ہوچکا ہے جبکہ دونوں میاں بیوی خود43برس کے ہیں۔ ریڈفورڈز کے ہاں پہلے بچے کی پیدائش اس وقت ہوئی تھی جب یہ دونوں صرف 14برس کے تھے۔ دونوں ایک دوسرے سے بچپن سے واقف اور محبت کے بندھن میں بندھے ہوئے تھے یہی وجہ ہے کہ انہوں نے دوسروں جوڑوں کی نسبت انتہائی کم عمری میں اپنے خاندان کے آغاز کا فیصلہ کر ڈالا۔ نومولود سے بڑا بچہ کیسپر فی الحال2برس کا ہے جبکہ خود یہ جوڑا دادا دادی بھی بن چکا ہے۔ دلچسپ امر یہ ہے کہ ریڈفورڈز اپنے خاندان میں 18ویں بچے کی پیدائش کے بعد بھی خاندان کے حجم سے مطمئن نہیں ہیں۔ ان کا کہنا ہے کہ اگر ان کے ہاں مستقبل میں کوئی اور بچہ پیدا ہوا تو وہ اس کا بہت شوق سے استقبال کریں گے۔