اسلام آباد (نیوزڈ یسک )انٹرنیٹ کے ذریعے محبت اور ہمسفر کی تلاش کا رجحان عام ہوتا جارہا ہے لیکن اکثر نوجوان کوئی تلخ تجربہ ہونے کے بعد ہی انٹرنیٹ کی غیر حقیقی دنیا سے باہر آتے ہیں۔ویت کی ایک جواں سال لڑکی نے بھی ہمسفر کی تلاش کے لئے اپنے والدین یا بزرگوں سے بات کرنے کی بجائے ایک سوشل میڈیا ویب سائٹ کا سہارا لیا جو اپنے اراکین کو ان کی ترجیحات کے مطابق ساتھی ڈھونڈ کر رابطہ کرواتی ہے۔ لڑکی نے ویب سائٹ کی رکن بننے کے بعد ممکنہ ساتھی ملنے کے لئے دو ہفتے کا انتظار کیا جس کے بعد اسے ایک صاحب کے بارے میں معلومات فراہم کی گئیں۔ انٹرنیٹ پر ہی دونوں کے درمیان ملاقات کا وقت طے پایا لیکن جب محبت کی متلاشی لڑکی اپنے ہونے والے محبوب سے ملنے کےلئے مقررہ جگہ پہنچی تو اصلیت جان کر اس کے پیروں تلے سے زمین نکل گئی۔ جس شخص کو اس کے لئے بہترین انتخاب کے طور پر تلاش کرکے بھیجا گیا تھا وہ اس کا 60 سالہ معذور ہمسایہ تھا جو اس کے سارے خاندان سے اچھی طرح واقفیت رکھتا تھا۔ اخبار ”صدا“ کا کہنا ہے کہ صدمے سے بے حال لڑکی، جس کانام خفیہ رکھا گیا ہے، فوری طور پر جائے ملاقات سے فرار ہوگئی۔ اخبار کو ملنے والی اطلاعات کے مطابق لڑکی اپنے ساتھ پیش آنے والے واقع کی وجہ سے تاحال صدمے کی حالت میں ہے۔
۔۔۔۔۔۔۔۔۔۔۔۔۔۔۔۔۔۔۔۔