اسلام آباد (نیوز ڈیسک )برطانوی نوجوان لڑکی کی گاڑی پر 5ہزار سے زائد شہد کی مکھیوں نے دھاوا بول دیا ہے۔ شہد کی مکھی کے کاٹنے سے تو سب کو ہی ڈر لگتا ہے اور شہد کی مکھیوں کا چھتا دیکھتے ہی لوگوں کی دوڑیں لگ جاتی ہیں۔ کچھ ایسا ہی برطانوی کاﺅنٹی کارن وال کی رہائشی نوجوان لڑکی کے ساتھ پیش آیا، جب روڈ پر کھڑی اس کی کار کے اوپر 5ہزار سے زائد شہد کی مکھیوں نے قبضہ جما لیا۔ 26سالہ کیلی میری نامی لڑکی کی گاڑی پر پہلے ملکہ مکھی آکر بیٹھی اور پھر دیکھتے ہی دیکھتے 5ہزار شہد کی مکھیوں نے گاڑی پر دھاوا بول دیا، جو شاید گاڑی پر ہی اپنا چھتا بنانے کی خواہشمند تھیں۔ کسی غیر متوقع نقصان سے محفوظ رہتے ہوئے، لڑکی نے فوری طور پر ریسکیو اہلکاروں کو طلب کیا، جنہوں نے گاڑی کو مکھیوں کے چنگل سے آزاد کروا دیا۔