لاہور(نیوزڈیسک) پاکستان نے دوسرے ون ڈے میں زمبابوے کو 6 وکٹوں سے شکست دے کر 3 میچوں کی سیریز 1-2 سے اپنے نام کرلی۔قذافی اسٹیڈیم لاہور میں کھلیے جانے والے دوسرے ایک روزہ میچ میں پاکستان نے 259 رنز کا ہدف 48ویں اوور میں پورا کرلیا جب کہ پاکستان کی جانب سے کپتان اظہر علی نے کیرئیر کی دوسری سنچری اسکور کی۔ پاکستان کی جانب سے اظہر علی اور سرفراز احمد نے ٹیم کو 46 رنز کا آغاز فراہم کیا تاہم سرفراز احمد 22 رنز بنا کر پویلین لوٹ گئے جس کے بعد حفیظ کریز پر آئے مگر وہ بھی صرف 15 رنز ہی بناسکے جب کہ اظہر علی اور اسد شفیق کے درمیان تیسری وکٹ کے لئے 85 رنز کی شراکت داری قائم ہوئی تاہم اسد شفیق 39 اور اظہر علی 102 رنز کی شاندار اننگز کھیلنے کے بعد آوٹ ہوئے جب کہ حارث سہیل نے 52 رنز کی اننگز کھیلی۔زمبابوے نے مقررہ 50 اوورز میں 7 وکٹوں کے نقصان پر 258 رنز بنائے جب کہ سکنر رضا اپنے کیرئر کی دوسری سنچری بنانے میں کامیاب رہے۔ زمبابوے کی جانب سے وسی سبانڈا اور چمو چھبابا نے ٹیم کو عمدہ آغاز فراہم کیا اور پہلی وکٹ کے لئے 83 رنز کی شراکت داری قائم کی لیکن سبانڈا 13 رنز کے انفرادی اسکور پرحفیظ کی گیند پر آوٹ ہوگئے جب کہ مساکڈزا 18 رنز پر یاسر شاہ کا شکار بنے، چھبابا صرف ایک رنز کے فرق سے اپنی پہلی سنچری مکمل نہیں کرسکے اور 99 رنز پر پویلین لوٹ گئے۔ پاکستان کی جانب سے وہاب ریاض اور یاسر شاہ نے 2،2 جب کہ حفیظ اور شعیب ملک نے ایک، ایک وکٹ حاصل کی۔قبل ازیں پاکستان کے کپتان اظہر علی نے ٹاس جیت کر مہمان ٹیم کو پہلے بیٹنگ کی دعوت دی۔ اظہر علی کا کہنا تھا کہ دوسرے ون ڈے میں کامیابی حاصل کر کے سیریز اپنے نام کرنے کی بھرپور کوشش کریں گے۔ دوسری جانب زمبابوے کے کپتان ہیملٹن چگمبورا کا کہنا تھا کہ ٹیم میں 4 تبدیلیاں کی گئی ہیں اور میچ جیت کر سیریز میں واپس آنے کی کوشش کریں گے۔