اسلام آباد(نیوز ڈیسک) پاکستان تحریک انصاف کی رکن قومی اسمبلی اسماء حدید نے اپنے خلاف ہونے والے پروپیگنڈے پر ویڈیو پیغام جاری کیا ہے، اس پیغام میں انہوں نے کہا کہ میری سوشل میڈیا پر جو ویڈیو چل رہی ہے اس حوالے سے میں اپنے بہن بھائیوں کو دوبارہ کلیئر کر دوں کہ قومی اسمبلی میں صبح سے اسرائیلی طیارے پر بحث چل رہی تھی اور اس میں کافی گرما گرمی ہو گئی اور پھر ہمارے مولانا بھائی وغیرہ سب لڑنے لگ گئے اور جھگڑا شروع ہوگیا۔
اس وقت میں نے سوچا کہ میں ان کو بتاؤں جو میں محسوس کرتی ہوں، اسماء حدید نے کہا کہ میں نے ان بھائیوں سے کہا کہ جس طرح آپ لوگ ادھر لڑ رہے ہو، جس طرح آپ یہودیوں کے اوپر غصہ دکھا رہے ہو، آپ لوگ جا کر مسلمان بہن بھائیوں کی یہودیوں سے جان کیوں نہیں چھڑوا دیتے، آپ کوئی بھی طریقہ اختیار کر لیں، کوئی بھی مشترکہ لائحہ عمل اختیار کر لیں تاکہ لڑائی بند ہو جائے اور ہماری عورتیں اور بچے ذبح ہونے بند ہو جائیں، اس پر میں نے ان سے کہا تھا کہ جب یہودیوں کی بات آتی ہے تو یہاں پر کتنا زور زور سے بولتے ہو، حتیٰ کہ جب کشمیریوں کی بات آتی ہے تو سارے گالم گلوچ ، لڑنے اور ایک دوسرے کو قتل کرنے کے لیے تیار ہوتے ہیں لیکن جن کو جائز کے طور پر مارنا ہے ان کو کوئی نہیں مار رہا، ان کے ہاتھ کھلے ہیں وہ مسلمانوں کو ماری جا رہے ہیں، اسماء حدید نے کہا کہ پھر میں نے انہیں تجویز دی کہ کسی بھی بنیاد پر انہیں منوا لو، جیسے حضورؐ نے کیا، انہوں نے کہا کہ کسی بھی معاہدہ کرنے کے لیے یا سمجھنے کے لیے میرے پاس تو مثال کے لیے نمونہ صرف حضور پاکؐ ہیں، انہوں نے کہا کہ دوسری بات یہ ہو رہی ہے کہ میں نے اسرائیل کے متعلق کوئی قرارداد جمع کروائی ہے، انہوں نے اپنے ویڈیو پیغام میں کہا کہ میں نے کوئی ایسی قرارداد پیش نہیں کی ہے نہ میرا اس سے کوئی تعلق ہے، میں نے صرف ایک بات کی تھی مہربانی کرکے مسلمانوں کو یہودیوں کے ہاتھوں قتل اور ذبح ہونے سے بچایا جائے اور سارے مسلمان جن کو اللہ تعالیٰ نے قوت دی ہے وہ جائیں اور مسلمانوں کی جا کر جان چھڑائیں۔
