ایمسٹر ڈیم (نیوز ڈیسک)ہالینڈ میں انتہائی دائیں بازو کے سیاستدان گیئرٹ ولڈرز پر حملے کے مبینہ منصوبہ ساز پاکستانی ملزم کو ایک ڈچ عدالت میں پیش کر دیا گیا۔غیرملکی خبررساں ادارے کے مطابق ڈچ دفتر استغاثہ کی طرف سے جاری کردہ ایک بیان میں کہا گیا کہ اس مشتبہ ملزم کو جس پر الزام ہے کہ وہ ایک دہشت گردانہ حملہ اور قتل کی کوشش کرنے کے علاوہ لوگوں کو
اشتعال دلانا چاہتا تھاکچھ دیر کے لیے عدالت میں پیش کر دیا گیا۔ پولیس کے مطابق اس ملزم کو جس کے بارے میں کہا جاتا ہے کہ اس کا تعلق پاکستان سے ہے، دی ہیگ کی ایک عدالت میں پیش کیا گیا۔ہالینڈ کی پبلک پراسیکیوشن سروس کے جاری کردہ بیان کے مطابق اس ملزم نے دیگر مسلمانوں سے بھی مطالبہ کیا تھا کہ وہ بھی اس کے ارادوں کی حمایت کریں۔ اسی لیے حکام اس کی طرف سے دی جانے والی دھمکی کو بڑی سنجیدگی سے لے رہے ہیں۔ڈچ حکام نے یہ بھی بتایا کہ اس ملزم سے پوچھ گچھ ابھی جاری ہے اور وہ زیادہ سے زیادہ ممکن حد تک پابندیوں کے تحت پولیس کی تحویل میں ہے۔ قانونی اداروں کی دفتری زبان میں جاری کیے گئے اس موقف کا سادہ الفاظ میں مطلب یہ ہے کہ اس ملزم کو اپنے وکیل صفائی کے ساتھ ملاقات کے علاوہ کسی بھی دوسرے فرد سے ملنے کی اجازت نہیں ہے۔ڈچ حکام نے مبینہ طور پر پاکستان سے تعلق رکھنے والے اس ملزم کا نام بتانے سے معذرت کر لی ہے۔ اس بارے میں حکام نے کہاکہ فی الوقت ہم اس سے متعلق کوئی بھی معلومات میڈیا کو نہیں بتا سکتے۔اتنا تاہم ضرور کہا گیا کہ یہ ملزم اگلی عدالتی پیشی سے پہلے آئندہ دو ہفتوں تک پولیس کی تحویل ہی میں رہے گا۔واضح رہے کہ اس سے قبل ڈچ پولیس کی جانب سے جاری بیان میں بتایا گیا تھا کہ اس نے گیئرٹ ولڈرز کے قتل کی منصوبہ بندی کرنیوالے ایک شخص کو گرفتار کیا ہے جس کی قومیت پاکستانی ہے ، یہ شخص گستاخانہ خاکوں کے مقابلوں کے انعقاد کے خلاف لابنگ اور لوگوں کو اشتعال دلانے سمیت گیئرٹ ولڈرز کو قتل کرناچاہتا تھا۔
