لاہور ( این این آئی) محکمہ سول ایوی ایشن نے لاہور ریڈار کے زیر انتظام 7 بین الاقوامی فضائی روٹس کو کابل سے پاکستان داخل ہونے والی پروازوں کے لیے 16 ستمبر تک بند کر دیا، بند کیے جانے والے روٹس پر 33 ہزار فٹ کی بلندی سے کم اونچائی پر پرواز کی اجازت نہیں ہو گی۔محکمہ سول ایوی ایشن کی جانب سے جاری کیے جانے والے انتباہ کے مطابق افغانستان کے دار الحکومت کابل کی فضائی حدود سے پاکستان
کی فضائی حدود میں داخل ہونے والی پروازوں کو سات مختلف مقامات سے داخل ہونے سے 16ستمبر تک روکا گیا ہے خلاف ورزی کرنے پرکارروائی عمل میں لائی جائے گی۔محکمہ سول ایوی ایشن نے اپنی نئی جاری کردہ تنبیہہ سے افغانستان کی سول ایوی ایشن اتھارٹی اور کابل ائیر پورٹ انتظامیہ سمیت تمام ائیر لائنز کو آگاہ کر دیا ہے، بند کیے جانے والے تمام روٹس لاہور ریڈار کے زیر انتظام کنٹرول کیے جاتے ہیں۔
