لندن (نیوز ڈیسک) مسلم لیگ (ن) کے مرکزی میڈیا سیل کے انچارج سینیٹر مشاہد حسین سید اچانک لندن کے دورہ پر پہنچ گئے ہیں، وہ لندن میں مسلم لیگ (ن) کے قائد میاں نواز شریف اور مریم نواز سے اہم ملاقات کریں گے جبکہ بیگم کلثوم نواز کی عیادت کرنے کے بعد ہفتہ کو وطن واپس چلے جائیں گے۔
مسلم لیگ (ن) کے ذرائع نے خبر رساں ادارے ’’آئی این پی‘‘ کو بتایا کہ مشاہد حسین سید جو جمعہ کو نجی ایئر لائن کی پرواز سے اسلام آباد سے ہیتھرو ایئرپورٹ پہنچے ہیں اور وہ 40گھنٹوں کیلئے برطانیہ کے دورہ پر آئے ہیں ان کی (آج) کسی بھی وقت مسلم لیگ (ن) کے قائد میاں نواز شریف اوران کی صاحبزادی مریم نواز سے ملاقات ہو گی جس میں وہ انہیں مسلم لیگ (ن) کی انتخابی حکمت عملی، ملک کی سیاسی صورتحال، مسلم لیگ (ن) کے رہنماؤں کے خلاف نیب کی کاروائیوں اور انتخابی مہم سمیت دیگر اہم امور پر بات چیت کریں گے، مشاہد حسین سید نواز شریف کو مسلم لیگ (ن) کی انتخابی مہم کیلئے مریم نواز کی فوری وطن واپسی کیلئے بھی پارٹی رہنماؤں کا پیغام پہنچائیں گے۔ ذرائع کا کہنا ہے کہ مشاہد حسین سید بیگم کلثوم نواز کی عیادت بھی کریں گے اور وہ (آج) ہفتہ کی رات لندن سے واپس لاہور پہنچ جائیں گے جس کے بعد مسلم لیگ (ن) کے صدر میاں شہباز شریف سے ملاقات کر کے انہیں نواز شریف سے ہونے والی ملاقات کے بارے میں بریفنگ دیں گے۔ مسلم لیگ (ن) کے مرکزی میڈیا سیل کے انچارج سینیٹر مشاہد حسین سید اچانک لندن کے دورہ پر پہنچ گئے ہیں، وہ لندن میں مسلم لیگ (ن) کے قائد میاں نواز شریف اور مریم نواز سے اہم ملاقات کریں گے جبکہ بیگم کلثوم نواز کی عیادت کرنے کے بعد ہفتہ کو وطن واپس چلے جائیں گے۔
