کراچی(نیوز ڈیسک) بلاول بھٹی بنگلہ دیش کے خلاف دوسرے ٹیسٹ میں زخمی فاسٹ باو¿لر راحت علی کی جگہ لیں گے۔پاکستان کرکٹ بورڈ نے بتایا کہ ان دنوں پاکستان ’اے‘ ٹیم کے ساتھ سری لنکا میں موجود 23 سالہ بھٹی چھ مئی سے شروع ہونے والے دوسرے ٹیسٹ سے پہلے ڈھاکا پہنچ جائیں گے۔
بورڈ نے ایک جاری بیان میں بتایا کہ قومی نیشنل کمیٹی نے بنگلہ دیش میں موجود ٹیم انتظامیہ سے مشاورت کے بعد بھٹی کو راحت علی کا متبادل منتخب کیا ہے۔خیال رہے کہ دونوں ٹیموں کے درمیان ان دنوں کھلنا میں پہلا ٹیسٹ میچ کھیلا جا رہا ہے۔بنگلہ دیش پر آئی مہمان ٹیم کو خراب پرفارمنس اور زخمی کھلاڑیوں نے پریشان کر رکھا ہے۔
بلے باز صہیب مقصود اور فاسٹ باو¿لر سہیل خان دورے سے پہلے ہی بالترتیب ہاتھ میں فریکچر اور کمر میں تکلیف کی بنا پر سکواڈ سے باہر ہو گئے تھے۔بعد میں احسان عادل اور راحت کے ساتھ ساتھ لیگ سپنر یاسر شاہ بھی زخمی ہونے کی وجہ سے وائٹ واش ہونے والی تاریخی ون ڈے سیریز میں پاکستان کی نمائندگی نہ کر سکے تھے۔