واشنگٹن(این این آئی)ویب سائٹ وکی لیکس نے کاپی رائٹ کی مبینہ خلاف ورزی کرتے ہوئے امریکی صدر ڈونلڈ ٹرمپ کے بارے میں نئی شائع ہونے والی ناقدانہ کتاب کے مواد کا لنک ٹویٹر پر جاری کردیا ہے۔میڈیارپورٹس کے مطابق مصنف مائیکل وولف کی کتاب ’’ آتش اور غیظ ‘‘ ٹرمپ کے وائٹ ہاؤس کے اندر (فائر اینڈ فیوری، ان سائیڈ دا ٹرمپ وائٹ ہاؤس) کے مواد (ٹیکسٹ) کی برقی تصویر آن لائن جاری کی گئی ہے۔
یہ کتاب اس سے صرف دو روز قبل ہی فروخت کے لیے مارکیٹ میں آئی ہے۔پبلشر یا مصنف کی اجازت کے بغیر کسی کتاب کا ٹیکسٹ پوسٹ کیا جانا کاپی رائٹ کی پابندیوں کی خلاف ورزی کے زمرے میں آتا ہے اور اس سے کتاب کی فروخت پر اثرات مرتب ہوسکتے ہیں لیکن وکی لیکس کی جانب سے اس کتاب کا لنک ٹویٹ کیے جانے کے باوجود فائر اینڈ فیوری امازون کی فروخت ہونے والی ہارڈ کور کتب اور ای بْک میں پہلے نمبر پر تھی۔
اس کتاب میں مصنف نے صدر ڈونلڈ ٹرمپ کی شخصیت اور کردار کی کچھ اس طرح کی تصویر کشی کی ہے کہ انھیں اپنے دفتر کی اہمیت کا کچھ بھی ادراک نہیں ہے اور ان کے اپنے مشیر اور معاونین ان کی اہلیت و صلاحیت پر سوال اٹھا رہے ہیں۔صدر ٹرمپ نے اس کو ایک ’’جعلی کتاب‘‘ قرار دیا ہے اور کہا ہے کہ اس کا مصنف بالکل بھی قابل اعتبار نہیں ہے۔ان کے معاونین نے اس کتاب کے مندرجات کو مسترد کردیا ہے۔
