اسلام آباد (مانیٹرنگ ڈیسک) آئی ایس پی آر کا کہنا ہے کہ کالعدم تنظیم کے ایک اہم ملک دشمن دہشت گرد کو ہلاک کر دیا گیا ہے، تفصیلات کے مطابق ایک نجی ٹی وی کی رپورٹ کے مطابق آئی ایس پی آر کا کہنا ہے کہ سکیورٹی فورسز نے کلاچی میں ایک کامیاب آپریشن کیا جس کے دوران کالعدم تنظیم کے ایک اہم دہشت گرد کو ہلاک کر دیا گیا ہے۔ سکیورٹی فورسز کی جانب سے اس آپریشن کے دوران نومبر میں ڈیرہ اسماعیل خان میں ہونے والی
ایک جھڑپ میں میجر اسحاق کو شہید کرنے والا دہشت گرد ظاہر شاہ اپنے ایک ساتھی سمیت مارا گیا ہے۔ ان دونوں دہشت گردوں کا تعلق کالعدم تنظیم تحریک طالبان پاکستان سے تھا اور وہ علاقے میں بارودی سرنگیں بچھانے کے مشن پر مامور تھے۔ یاد رہے کہ ڈیرہ اسماعیل خان میں دہشتگردوں کے ٹھکانے کی اطلاع ملنے پر سکیورٹی فورسز کی طرف سے آپریشن کیا گیا تھا جس میں دہشت گردوں کی فائرنگ کا میجر اسحاق نشانہ بنے اور شہید ہو گئے تھے۔
