لاہور (این این آئی) وزیر ریلویز خواجہ سعد رفیق نے کہا ہے کہ پاکستان ریلویز میں چہرے کی شناخت کے ذریعے حاضری کا کمپیوٹرائزڈ نظام لایا جارہا ہے ، ڈائریکٹوریٹ آف انفارمیشن اینڈ ٹیکنالوجی میں چہرے کی شناخت کے ذریعے کمپیوٹرائزڈ حاضری کے جدید نظام کی تجرباتی بنیادوں پر تنصیب کامیاب رہی ہے۔ وزیر ریلویز نے مزید کہا کہ ورکشاپوں میں محنت کش ہاتھوں پر نشانات کے باعث فنگر پرنٹس کی بنیاد پر بائیو
میٹرک حاضری نہیں لگا سکتے ہیں لیکن حاضری کی جدید کمپیوٹرائزڈ ڈیوائسز چہرے کی عینک کے ساتھ بھی شناخت کر سکے گی۔ انہوں نے کہا کہ پاکستان ریلوے ورکشاپوں میں چہرے کی شناخت کے ذریعے حاضری لگانے والاسرکاری سطح پر پہلا محکمہ ہو گا ، ریلوے ورکشاپوں میں حاضری کے اس جدید نظام کے لئے ابتدائی تخمینہ تیار کر لیا گیا ہے جو اپنے نتائج اور فوائد کے مقابلے میں مہنگا نہیں ہے۔اس حوالے سے ڈائریکٹر انفارمیشن اینڈ ٹیکنالوجی فہد رحمان نے بتایا کہ اس جدید فیس ریکیگنیشن سسٹم کے ذریعے گھوسٹ ملازمین اور پراکسی حاضری کا قلع قمع ہو جائے گا۔
