برمنگھم(مانیٹرنگ ڈیسک) 10 سالہ لڑکے ٹوبے لیو نے ذہنی آزمائش کے امتحان میں حیران کن نتائج دے کر آئی کیو امتحان کے ادارے ’مینسا‘ کے کم عمر ترین ممبر کا اعزاز حاصل کر لیا ٹوبے عظیم سائنس دانوں آئن اسٹائن اور اسٹیفن ہاکنگ کے برابر آئی کیو لیول حاصل کرکے دنیا بھر میں ریاضی کے جینیئس سمجھے جانے لگے ہیں۔مغربی میڈیا کے مطابق اسکول کا کام 10 برس کے ٹوبے لیو کے لیے کھیل سے زیادہ کچھ نہیں، وہ

بڑے امتحانی معمے اور پیچیدہ آزمائشی سوالات کو منٹوں میں حل کر لیتا ہے کیوں کہ اس حیران کن ذہنیت کے حامل بچے کا آئی کیو لیول معروف سائنس دان اسٹیفن ہاکنگ اور البرٹ آئن اسٹائن کے برابر ہے۔ٹوبے نے اس اعزاز کو حاصل کرنے پر خوشی کا اظہار کرتے ہوئے کہا کہ ریاضی میرا پسندیدہ مضمون ہے اور اسی مضمون میں سب سے زیادہ آئی کیو اسکور حاصل کرنے پر مجھے بہت خوشی محسوس ہو رہی ہے۔البرٹ آئن اسٹائن اور اسٹیفن ہاکنگ کے برابر آئی کیو رکھنے والے 10 سالہ ٹوبے لیو نے بتایا کہ باوجود اس کے کہ ریاضی میرا عشق ہے لیکن مجھے اس حد تک کامیابی کی بالکل امید نہیں تھی۔ٹوبے لیو کے استاد نے اپنے ہونہار طالب علم کی کامیابی پر فخر کا اظہار کرتے ہوئے کہا کہ حقیقتاً یہ ایک قابل فخر اعزاز ہے اور ٹوبے نے اپنے والدین، اسکول اور اساتذہ کا سر فخر سے بلند کردیا ہے جس کے لیے سخت محنت کی جس پر ٹوبے کو گلے لگانے کا دل کرتا ہے۔خیال رہے ’مینسا‘ آئی کیو جانچنے کا ادارہ ہے جو 1946 میں قائم ہوا اور جس کا مقصد انسانی ذہانت کو انسانیت کی خدمت کے لیے استعمال کرنے اور ذہنی استعداد کو بڑھانے کے لیے اپنے ممبران کو مواد اور ماحول فراہم کرنا ہے جب کہ آج مینسا کے ممبران کی تعداد 20 ہزار ہوچکی ہے۔’مینسا‘ برطانیہ کے چیف ایگزیکٹو جان اسٹیوینج نے کہا کہ ہم کم عمر ترین ممبر ٹوبے لیو کو خوش آمدید کہتے ہیں جنہوں نے ریاضی میں عظیم سائنس دانوں اسٹیفن ہاکنگ اور آئن اسٹائن کے برابر آئی کیو حاصل کر کے دنیا کو ورطہ حیرت میں ڈال دیا ہے۔