اسلام آباد (این این آئی) صوبہ خیبر پختونخوا کی آبادی 3 کروڑ 5 لاکھ 23 ہزار 371 جبکہ گھرانوں کی تعداد 38 لاکھ 45 ہزار 168 ہے۔ فاٹا کی آبادی 50 لاکھ 1 ہزار 676 ہے جبکہ گھرانوں کی تعداد 5 لاکھ 58 ہزار 379 ہے۔ پنجاب کی آبادی 11 کروڑ 12 ہزار 442 نفوس پر مشتمل ہے جبکہ گھرانوں کی تعداد 1 کروڑ 71 لاکھ 3 ہزار 835 ہے۔ سندھ کی آبادی 4 کروڑ 78 لاکھ 86 ہزار 51 ہے
اور گھرانوں کی تعداد 85 لاکھ 85 ہزار 610 ہے۔ بلوچستان کی آبادی 1 کروڑ 23 لاکھ 44 ہزار 408 اور اس کے گھرانوں کی تعداد 17 لاکھ 75 ہزار 937 ہے۔ اسی طرح اسلام آباد کیپیٹل ٹیریٹری کی آبادی 20 لاکھ 6 ہزار 572 اور گھرانوں کی تعداد 3 لاکھ 36 ہزار 182 ہے۔ عبوری نتائج کے مطابق شہری آبادی میں اضافے کا رجحان 36.38 فیصد ہے۔ دریں اثنا پاکستان کی چھٹی قومی خانہ و مردم شماری کے عبوری نتائج جاری کر دیئے گئے ٗملکی آبادی 1998ء سے 2017ء کے دوران 2.4 فیصد کی سالانہ شرح نمو کے ساتھ 20 کروڑ 77 لاکھ 74 ہزار ہوگئی۔ جمعہ کو چھٹی مردم و خانہ شماری کے عبوری نتائج مشترکہ مفادات کونسل میں پیش کئے گئے جس نے تفصیلی جائزہ لینے کے بعد وزارت شماریات کو عبوری نتائج جاری کرنے کی اجازت دی اس سلسلے میں وزیراعظم شاہد خاقان عباسی کی زیر صدارت مشترکہ مفادات کونسل کا اجلاس ہوا، جس میں چھٹی مردم شماری کے ابتدائی اور عبوری نتائج پر غور کیا گیا۔ اجلاس کے بعد وزیراعظم سیوزرائیاعلیٰ نے الگ الگ ملاقاتیں بھی کیں۔مشترکہ مفادات کونسل نے پاکستان بیورو برائے شماریات کو چھٹی مردم و خانہ شماری کے حتمی نتائج کو مرتب کرنے کا کام تیز کرنے کی ہدایت بھی کی۔ مجموعی آبادی میں ملک میں مقیم افغان اور دیگر غیر ملکی بھی شامل ہیں جو مقامی آبادی کے ساتھ رہائش پذیر ہیں تاہم اس میں رفیوجی ویلیج میں مقیم افغان مہاجرین اور سفارت کار شامل نہیں ہیں۔
عبوری نتائج کے مطابق ملکی آبادی میں 1998ء کی نسبت 57 فیصد اضافہ ہوا جبکہ 1981ء کی مردم شماری کے بعد سے ملکی آبادی میں 146.6 فیصد اضافہ ریکارڈ کیا گیا ہے۔ اس طرح ملکی آبادی میں 1998ء سے 2017ء کے دوران سالانہ اوسطاً 2.40 فیصد کا اضافہ ہوا ہے۔ پاکستان میں گھرانوں کی مجموعی تعداد 3 کروڑ 22 لاکھ 5 ہزار 111 ہو گئی ہے۔
پاکستان کے دیہی علاقوں میں گھرانوں کی تعداد 2 کروڑ 12 ہزار 797 جبکہ شہروں میں گھرانوں کی تعداد 1 کروڑ 21 لاکھ 92 ہزار 314 ہے۔ دیہی علاقوں کی مجموعی آبادی 13 کروڑ 21 لاکھ 89 ہزار 531 ہو گئی ہے جو 2.23 فیصد سالانہ کی اوسط شرح نمو کو ظاہر کرتی ہے۔ شہری علاقوں کی مجموعی آبادی 7 کروڑ 55 لاکھ 84 ہزار 989 ہے جو 2.70 فیصد سالانہ کی شرح نمو کو ظاہر کرتی ہے۔
