اسلام آباد(مانیٹرنگ ڈیسک)شکار پور کچے کے علاقے جتوئی برادری کے دو گروپوں میں مورچہ بند تصادم، 10افراد ہلاک، وزیراعلیٰ سندھ نے ڈی آئی جی لاڑکانہ سے رپورٹ طلب کرلی۔ تفصیلات کے مطابق شکار پور کچے کے علاقے میںجتوئی برادری کے دو گروپوںسعید خانانی اور بڈانی میں مورچہ بند تـصادم کے نتیجے میں 10افراد ہلاک ہو گئے ہیں جبکہ تاحال فائرنگ کا سلسلہ دونوں اطراف سےوقفے وقفے سے جاری ہے۔جدید اسلحے کے استعمال کے دوران 1 راہگیر بچی نائلہ سمیت 10 افراد
قتل ہو چکے ہیں۔دونوں جانب سے بھاری ہتھیاروں راکٹ لانچر اور ایل ایم جی جیسے خطرناک ہتھیاروں کا آزادانہ استعمال کیا گیا ہے۔ وزیراعلیٰ سندھ مراد علی شاہ نے واقعہ سے متعلق ڈی آئی جی لاڑکانہ سے رپورٹ طلب کر لی ہے ۔پولیس اور دیگر سکیورٹی اداروں نے علاقے کو گھیرے میں لے رکھا ہے اور علاقے کا کنٹرول سنبھال لیا ہے۔ واضح رہے کہ رمضان میں دونوں گروپوں کے درمیان پولیس کی مخبری کرنے پرجھگڑا بھی ہو چکا ہے جس میں دو افراد جان کی بازی ہار گئے تھے۔