اسلام آباد(مانیٹرنگ ڈیسک)عوامی مسلم لیگ کے سربراہ شیخ رشید احمد کے بعد پاکستان کی ایک اور اہم سیاسی شخصیت بھی پاکستان سپر لیگ کے فائنل میچ میں عوام کے درمیان فرشی سیٹوں پر براجمان نظر آئے گی۔ تفصیلات کے مطابق جماعت اسلامی پاکستان کے امیر سینیٹر سراج الحق نے بھی پاکستان سپر لیگ کے لاہور قذافی سٹیڈیم میں ہونے والے
فائنل میچ کیلئے دو ٹکٹ حاصل کر لئے ہیں ۔ پانچ پانچ سو روپے والے ٹکٹ حاصل کرنے والے امیر جماعت اسلامی پاکستان سینیٹر سراج الحق سٹیڈیم میں موجود عوامی نشستوں یعنی فرشی نشستوں پر براجمان ہو کر میچ سے لطف اندوز ہوں گے اس بات کی تصدیق جماعت اسلامی کے سیکرٹری اطلاعات امیر العظیم نے کرتے ہوئے کہا ہے کہ عوامی لیڈر عوام کے درمیان میچ سے لطف اندوز ہونگے۔واضح رہے کہ جماعت اسلامی کی اتحادی جماعت تحریک انصاف کے سربراہ عمران خان اور پاکستان پیپلزپارٹی کے صدر آصف علی زرداری پاکستان سپر لیگ کے فائنل میچ کے لاہور میں انعقاد کی مخالفت کر چکے ہیں جبکہ دوسری جانب پاکستان کی عوام کی بڑی تعداد، پاک فوج اور حکومت پی ایس ایل فائنل کے لاہور میں انعقاد کو ہر صورت ممکن بنانے کیلئے پرعزم نظر آرہے ہیں۔
